BAYRAQDAR MEDİA – Rəqəmsal İnkişaf və Nəqliyyat Nazirliyinin tabeliyində fəaliyyət göstərən “AzInTelecom” MMC-nin nümayəndə heyəti bugünlərdə qardaş Türkiyədə işgüzar səfərdə olub.
Xəbəri BAYRAQDAR MEDİA-ya Türkiyədə yaşayan jurnalist Oktay Hacımusalı verib.
Xəbərdə deyilir ki, Türkiyənin paytaxtı Ankara şəhərindən başlanan görüşlər zamanı ilk olaraq Türkiyə Cumhurbaşqanlığının Rəqəmsal Transformasiya Ofisi ziyarət olunub. Görüş zamanı “Hökumət buludu” və rəqəmsal transformasiya ilə bağlı mövzular müzakirə olunub.
Daha sonra “AzInTelecom” təmsilçiləri Sosial Təminat Qurumunda (Sosyal Güvenlik Kurumu) görüşlər keçirib. Nümayəndə heyəti baş direktor müavini Dr. Gürhan Yücel və Qurum rəsmiləri ilə görüşüb. İclasda çıxış edən qardaş ölkənin müvafiq qurumunun rəsmisi G.Yücel dost və qardaş ölkə Azərbaycanın nümayəndə heyətini və Rəqəmsal Transformasiya İdarəsinin nümayəndələrini qəbul etməkdən məmnunluğunu ifadə edərək, “iki ölkə olaraq birik və hamımız bir yerdəyik. Birlikdə informasiya mübadiləsi həyata keçirəcəyik. Bu, bizim üçün böyük xoşbəxtlikdir” deyib.
“AzInTelecom” MMC-nin rəhbəri Elxan Əzizov Azərbaycanda yaradılacaq data mərkəzləri üçün araşdırma apardıqlarını bildirərək, “Azərbaycanda qurulacaq data mərkəzləri üçün Türkiyənin data mərkəzlərinə baş çəkmək və təcrübənizdən yararlanmaq istədik. Bizi qəbul etdiyiniz üçün təşəkkür edirik” deyə bildirib.
Qurumun Rəqəmsal Transformasiya Koordinasiya Şöbəsinin rəhbəri Furkan Civelek SGK-nın dövlət sektorunda ən böyük məlumat mərkəzinə malik olduğunu bildirərək, “uzun müddətdir ki, Azərbaycanla, xüsusən də rəqəmsallaşma sahəsində əməkdaşlığı inkişaf etdirməyə çalışırıq. Məlumat mərkəzinin qurulması nöqtəsində araşdırma aparırlar. Onlar da bizim təcrübəmizdən faydalanmaq istəyirdilər. Türkiyənin ən böyük məlumat mərkəzi olaraq ağlımıza ilk gələn SGK oldu. İstədik ki, onlar bu yeri görsünlər və təcrübənizdən faydalansınlar” deyə bildirib.
Görüşdən sonra SGK İnformasiya Sistemi və Kibertəhlükəsizlik Departamentinin rəhbəri Ali Kağan Turan nümayəndə heyətini data mərkəzində gəzdirərək onun fəaliyyəti və iş sistemi haqqında məlumat verib.
