BAYRAQDAR MEDİA – Məlum olduğu kimi, bu il aprelin 16-da Tunisin Qabes şəhəri yaxınlığında Ekvatorial Qvineya bayrağı altında üzən “Xelo” gəmisi əlverişsiz hava şəraiti səbəbindən qəzaya uğrayıb. Gəminin 7 nəfərlik heyət üzvündən iki nəfəri – Fədail Səfərov Əhməd oğlu və Əli Pənahlı Mirzə oğlu Azərbaycan Respublikasının vətəndaşı olublar. Gəminin heyət üzvləri hadisənin araşdırılması və hüquqi qiymət verilməsi məqsədilə həmin gündən etibarən Tunisin hüquq-mühafizə orqanları tərəfindən saxlanılıb.
Bu barədə BAYRAQDAR MEDİA-ya avqustun 23-də Xarici İşlər Nazirliyinin Mətbuat xidməti idarəsindən bildirilib.
Qeyd edilib ki, vətəndaşlarımıza zəruri konsulluq yardımının göstərilməsi məqsədilə Azərbaycan Respublikasının Xarici İşlər Nazirliyi tərəfindən Tunisin aidiyyəti dövlət orqanlarına rəsmi müraciətlər ünvanlanıb: “Tunis Respublikasının aidiyyəti dövlət qurumlarında görüşlər keçirilib, gəminin saxlanılan heyət üzvləri ziyarət edilib. Eyni zamanda, gəminin sahibi olan şirkətlə əlaqə saxlanılaraq, çətin vəziyyətə düşmüş vətəndaşlarımıza hüquqi və maliyyə yardımının göstərilməsi məsələsi üzrə danışıqlar aparılıb. Avqustun 10-da Qabes şəhər İbtidai Məhkəməsində keçirilmiş son məhkəmə iclasında qəzaya uğramış gəminin heyət üzvlərinin azad olunmasına dair qərar qəbul edilib. Avqustun 21-də vətəndaşlarımız Tunisin ərazisini tərk ediblər”.
O da bildirilib ki, Azərbaycan hökuməti milli qanunvericiliyə və ölkəmizin tərəfdar çıxdığı beynəlxalq müqavilələrə uyğun olaraq harada olmasından asılı olmayaraq, öz vətəndaşlarının hüquq və azadlıqlarının qorunması istiqamətində zəruri tədbirlərin görülməsini davam etdirəcək.
