Son yeniləmə: 29 İyul 2022 09:48
Bayraqdar.info – İyulun 29-dan 31-dək Azərbaycanın milli-mənəvi dəyərlərinin təbliği, yaylaq və elat mədəniyyətinin yaşadılması və beynəlxalq miqyasda tanıdılması məqsədilə ikinci Milli Yaylaq Festivalı keçiriləcək. Festivalın keçirilməsində bir sıra dövlət qurumları və özəl qurumlar, o cümlədən Türkiyənin TİKA təşkilatı və Türk Hava Yolları yaxıdan dəstək olur.
Mədəniyyət Nazirliyindən verilən məlumata görə, artıq ikinci dəfə təşkil olunacaq festival bu il Hacıkənddə yerləşən Xan yaylağını məkan seçib. “Cavad xan” Tarix və Mədəniyyət fondunun təşəbbüsü, Mədəniyyət Nazirliyinin və bir sıra dövlət qurumlarının təşkilatçılığı ilə keçirilən II Milli Yaylaq Festivalında 22 xarici ölkədən 300-ə yaxın qonağın iştirakı gözlənilir: “Xan yaylağının ərazisində yerləşən Yaylaq yurdu etno-qəsəbəsində “Cıdır meydanı”, “Yaylaq bazarı”, “Sənətkarlıq guşəsi”, “Dədə Qorqud ocağı”, “Yaylaq yatağı”, “Pəhləvan meydanı”, “Aşıq Ələsgər ocağı”, “Yaylaq süfrəsi” kimi tematik guşələr fəaliyyət göstərəcək. Festivalda 70 mindən artıq tamaşaçının iştirakı nəzərdə tutulur. Festival iştirakçıları 3 gün ərzində xarici ölkələrdən dəvət olunmuş etnik musiqi qruplarının ifaları, yerli kollektivlərin çıxışları, aşıq deyişməsi, milli rəqslər, xalq mahnıları, Azərbaycanda yaşayan azsaylı xalqların mədəniyyət nümunələri, səhnəciklər və teatral kompozisiyalar, qədim xalq oyunları, sənətkarlıq məhsulları, milli geyim nümunələri ilə tanış ola və təbiət qoynunda əsl yaylaq həyatı yaşaya biləcəklər”.
Festival məkanında milli mədəniyyətimizin canlandırılması – tədbirin bədii proqramın, açılış və bağlanış mərasimlərinin təşkili, oyun və konsert səhnələrinin quraşdırılması Mədəniyyət Nazirliyinin dəstəyi ilə həyata keçirilir. İkinci Milli Yaylaq Festivalının bədii proqramına Akademik Musiqili Teatr, Dövlət Pantomima Teatrı, Şuşa Dövlət Musiqili Dram Teatrı, Bakı Dövlət Sirki, Gəncə Dövlət Dram Teatrı, Gəncə Dövlət Kukla Teatrı, Gəncə Dövlət Filarmoniyası, həmçinin Gəncə, Masallı və Şəki Regional Mədəniyyət İdarələrinin musiqi, rəqs və folklor kollektivlərinin çıxışları daxildir.
Onu da qeyd edək ki, iyulun 29-da məhşur Türkiyəli müğənni Uğur Işılak iştirakı ilə II Milli Yaylaq Festivalının açılışı konserti olacaq. Konsert proqramı saat 18:30-dan etibarən başlayacaq.
