Son yeniləmə: 20 İyul 2022 20:13
BŞTİ Milli Mətbuat Günü münasibətilə tədbir keçirib
Bayraqdar.info – 22 iyul-Millli Mətbuat Günü münasibətilə Bakı Şəhəri üzrə Təhsil İdarəsi (BŞTİ) tərəfindən media nümayəndələri ilə görüş keçirilib. Tədbirdə təhsil nazirinin müşaviri, Təhsilin İnkişafı Fondunun sədri Elnur Nəsibov, BŞTİ-nin müdiri Mehriban Vəliyeva, İdarənin müvafiq struktur bölmə rəhbərləri və KİV nümyəndələri iştirak ediblər.
BŞTİ-nin Mətbuat xidmətindən bayraqdar.info-ya verilən məlumata görə, tədbirdə çıxış edən E.Nəsibov Azərbaycan milli mətbuatının böyük və şərəfli inkişaf yolu keçdiyini bildirib. O, mətbuatın bütün dövrlərdə qabaqcıl ideyaların carçısı olduğunu və mütərəqqi ənənələri formalaşdıraraq cəmiyyət qarşısında üzərinə götürdüyü missiyanı layiqincə yerinə yetirdiyini deyib: “Hər il Milli Mətbuat Gününün yüksək səviyyədə qeyd olunduğunu deyən təhsil nazirinin müşaviri bu faktı cəmiyyətin mətbuata verdiyi önəmin ifadəsi kimi dəyərləndirib. KİV nümayəndələrini peşə bayramı münasibətilə təbrik edən E.Nəsibov onlara fəaliyyətlərində uğurlar arzulayıb”.
Məlumata əsasən, tədbirdə çıxış edən M.Vəliyeva media təmsilçilərini peşə bayramı münasibətilə təbrik edib, onlara paytaxtın təhsil həyatında baş verən yeniliklərin işıqlandırılmasında verdikləri dəstəyə və səmərəli əməkdaşlığa görə təşəkkürünü bildirib. Həmçinin təhsildən yazan, maarifçilik, məktəb təəssübkeşi olan qələm adamları ilə görüşdən məmnunluq ifadə edilib: “Azərbaycan mediasının zəngin ənənələri olduğunu deyən M.Vəliyeva bütün peşəkar media qurumlarının təhsilə, məktəbə daim dəyər verdiyini və bu sahənin fəaliyyətinin obyektiv işıqlandırılmasında həssaslıq göstərdiyini diqqətə çatdırıb”.
Məlumatda deyilir ki, çıxışda həmçinin, Azərbaycan mətbuatının inkişafında ulu öndər Heydər Əliyevin rolundan bəhs edilib: “İdarə müdiri ölkəmizdə demokratik mətbuatın formalaşmasında, onun hüquqi-normativ bazasının yaradılmasında, azad sözün, fikir və mətbuat azadlığının təmin edilməsində ümummilli liderin xidmətlərindən bəhs edib. Onu da qeyd edib ki, mətbuatın inkişafına dövlət qayğısı bu gün Prezident İlham Əliyevin rəhbərliyi ilə davam etdirilir”.
“Azərbaycanda demokratik mətbuatın formalaşmasında, onun hüquqi normativ bazasının yaradılmasında, fikir və mətbuat azadlığının təmin edilməsində ölkə Prezidenti cənab İlham Əliyevin rəhbərliyi ilə həyata keçirilən tədbirlər bütün dünyada yaxşı bir örnək kimi qəbul olunur”, – deyə M.Əliyeva əlavə edib.
Tədbirdə media nümayəndələri təşəkkürlərini bildirərək, qarşılıqlı əməkdaşlıqdan məmnunluqlarını ifadə ediblər.
Sonda media nümayəndələrinə Təşəkkürnamə və hədiyyələr təqdim edilib, xatirə şəkli çəkdirilib.
