Son yeniləmə: 18 İyul 2022 15:34
Bayraqdar.info – Azərbaycan Dövlət Akademik Opera və Balet Teatrının solisti Urfan Cəfərov “American Protégé-2022” beynəlxalq vokal müsabiqəsinin qalibi olub.
Bu barədə məlumat müsabiqənin https://americanprotege.com saytında yerləşdirilib.
Diasporla İş üzrə Dövlət Komitəsindən bayraqdar.info-ya iyulun 18-də verilən məlumata görə, Nyu-York şəhərində baş tutan müsabiqədə 21 ölkənin – ABŞ, Azərbaycan, Avstriya, Kanada, Bosniya və Herseqovina, Çin, Danimarka, Honq-Konq, Hindistan, İndoneziya, İran, Yaponiya, Litva, Malayziya , Yeni Zelandiya, Sinqapur, Cənubi Koreya, Şri-Lanka, Tailand və Ermənistanın vokal ifaçıları iştirak ediblər: “Müsabiqə böyük rəqabət şəraitində özünü sınamaq istəyən müğənnilər üçün nəzərdə tutulub. Bu mövsümdə münsiflər heyəti üzvlərinin tələbələrinə müsabiqədə iştirak etmək icazəsi verilməyib. Müsabiqədə ilk dəfə olaraq Azərbaycan təmsilçisi Urfan Cəfərov uğur qazanıb. 26 yaşlı soydaşımızın səsi və səhnə mədəniyyəti münsiflər heyətini heyran edib. Müsabiqənin müxtəlif kateqoriyalar üzrə qaliblərinə, o cümlədən Urfan Cəfərova “Karnegi Hall”da keçiriləcək qala-konsertdə iştirak etmək və bir solo-konsertlə çıxış etmək imkanı yaradılıb”.
Qeyd edilib ki, Urfan Cəfərov 2-5dekabr 2021-ci il tarixlərində Ukraynanın Truskavets şəhərində keçirilən Müslüm Maqomayev adına IV Beynəlxalq vokalçılar müsabiqəsinin dəqalibi olub: “Həmin müsabiqə Diasporla İş üzrə Dövlət Komitəsinin dəstəyi, Müslüm Maqomayev adına Azərbaycan Mədəniyyət Mərkəzinin və Truskavets şəhər şurasının təşkilatçılığı ilə baş tutub. Üzeyir Hacıbəyli adına Bakı Musiqi Akademiyasının məzunu Urfan Cəfərovxalq artisti, tanınmış vokal ifaçısı Xuraman Qasımovanın tələbəsi olub. Respublika və beynəlxalq müsabiqələr laureatı, gənc opera müğənniləri arasında Avropa çempionudur”.
