Bayraqdar.info – Əmək və Əhalinin Sosial Müdafiəsi Nazirliyi tərəfindən ötən ilin iyun ayında başladılan “Məşğulluq marafonu”na ötən dövrdə 654 işəgötürən qoşulub.
Bu barədə bayraqdar.info-ya iyulun 16-da İctimaiyyətlə əlaqələr və kommunikasiya şöbəsindən məlumata verilib.
Bildirilib ki, şəhid ailəsi üzvləri və Vətən müharibəsində yaralanmış qazilərin məşğulluğuna dəstək məqsədi daşıyan marafona onlar 4 min 585 vakansiya təqdim ediblər: “Həmin vakansiyalar üzrə artıq 2 min 500-ə yaxın şəhid ailəsi üzvü və qazi işlə təmin olunub. Onlardan 2 min 44 nəfəri qazi, qalanları şəhid ailələrinin üzvləridir. “Qəhrəmanlarımızın məşğulluğuna birgə dəstək olaq!” devizi altında keçirilən marafona qoşulmaq istəyən işəgötürənlər vakansiyalarını bu linkə daxil olmaqla göndərə bilər”.
Məlumatda qeyd olunub ki, şəhid ailələrinin üzvləri və Vətən müharibəsində yaralanmış qazilər isə marafondan faydalanaraq işlə təmin olunmaq üçün bu linkə daxil olaraq özləri haqqında məlumatları qeyd etməklə müraciətlərini edə bilərlər.
