Son yeniləmə: 14 İyul 2022 13:06
Bayraqdar.info – Azərbaycan üzrə 204 ümumi təhsil müəssisəsində elektron jurnal və gündəlik sisteminin tətbiqi davam etdirilir.
Bu barədə bayraqdar.info-ya iyulun 14-də Təhsil Nazirliyindən məlumat verilib.
Bildirilib ki, sözügedən təhsil müəssisələri Bakı, Sumqayıt şəhərləri və digər 11 bölgədə yerləşir: “Layihənin məqsədi müəssisə üzrə pedaqoji və inzibati-idarəetmə heyəti tərəfindən elektron qiymətləndirmənin səmərəli təşkili və sənədləşmə prosesinin rəqəmsallaşmasıdır. Bu sistem vasitəsilə hər müəssisə üzrə tədris növbələrinin təyin olunması, dərs cədvəllərinin tərtib edilməsi, elektron profillərin tənzimlənməsi və siniflər üzrə şagird məlumatlarının idarə olunması elektronlaşdırılıb. Həmçinin elektron jurnal şagirdlərin müvəffəqiyyət və davamiyyətini, eyni zamanda, mövzular üzrə dərs materiallarının mənimsənilməsi keyfiyyətini təhlil etmək imkanı da yaradır. Tətbiq olunan sistem vasitəsilə valideyn-məktəb və valideyn-müəllim əlaqələrinin əlçatanlığı artırılıb”.
Məlumata əsasən, hazırda elektron jurnal və gündəlik sistemi 204 təhsil müəssisəsinin 324 min 357 şagird və 23 min 337 müəllimini əhatə edir: “Növbəti tədris ilindən daha 158 müəssisədə də bu sistemin tətbiqi nəzərdə tutulur. Bununla da, Elektron jurnal və gündəlik” sisteminin 536 min 646 şagird və 37 min 448 müəllimi əhatə etməsi proqnozlaşdırılır. Qeyd edək ki, elektron jurnalın funksionallığı ilə bağlı istifadəçilərdən gələn tələb və təkliflər nəzərə almaqla hər tədris ilində təkmilləşdirmələr aparılır”.
