Son yeniləmə: 8 İyul 2022 16:52
Bayraqdar.info – “Təhsil” Respublika İdman Mərkəzi tərəfindən 2022-ci ilin altı ayı ərzində uşaq-gənclər idman-şahmat məktəblərinin uşaq, yeniyetmə və gənc idmançıları arasında 14 idman növü 23 respublika birinciliyi keçirilib. Həmin yarışlara Təhsil Nazirliyi sistemində fəaliyyət göstərən uşaq-gənclər idman-şahmat məktəblərindən 16 min 305 nəfər idmançı qatılıb. Onlardan 277-si qızıl, 265-i gümüş, 385-i bürünc medala layiq görülüb, ümumilikdə 927 medal qazanılıb.
Bu barədə bayraqdar.info-ya iyulun 8-də Təhsli Nazirliyindən məlumat verilib.
Bildirilib ki, keçirilmiş yarışların, aparılmış seleksiya işlərinin nəticələrinə əsasən, sözügedən və digər idman növləri üzrə “Təhsil” Respublika İdman Mərkəzinin kiçik yeniyetmələr, yeniyetmələr, gənclər, böyüklərdən ibarət yığma komandaları formalaşdırılıb, onların respublika və beynəlxalq səviyyəli yarışlarda iştirakları təmin edilib: “Qeyd olunan dövr ərzində Gənclər və İdman Nazirliyi və müvafiq federasiyalar tərəfindən 20 idman növü üzrə keçirilən 79 respublika yarışında uşaq-gənclər idman-şahmat məktəblərindən 2 min 702 nəfər iştirak edib, 333 qızıl, 304 gümüş, 351 bürünc olmaqla 988 medal qazanılıb. Eyni zamanda, mərkəzin yığma komandaları atletika üzrə Azərbaycan birinciliyinin, karate üzrə ölkə birinciliyinin, boks idman növü üzrə gənclər və yeniyetmələr arasında Azərbaycan birinciliyinin, basketbol üzrə Federasiya Kubokunun, həndbol üzrə Azərbaycan birinciliyinin, badminton üzrə yığma komandanın üzvləri ölkə birinciliyinin qalibi, veloidman üzrə yığma komandanın üzvləri Azərbaycan kubokunun sahibi olub”.
Məlumata əsasən, son 6 ayda Təhsil Nazirliyi sistemində fəaliyyət göstərən uşaq-gənclər idman-şahmat məktəblərinin idmançıları müxtəlif ölkələrdə keçirilən beynəlxalq turnirlərdə, Avropa və dünya birinciliklərində, Avropa Kuboku, Qran-Pri yarışlarında 153 qızıl, 81 gümüş və 66 bürünc olmaqla, ümumilikdə 300 medal qazanıblar: “Bu ilin yanvar-iyun aylarında uşaq və gənclərin idman ustalıqlarının artırılması, onlar arasında sağlam həyat tərzinin təbliği, vətənpərvərlik tərbiyəsinin gücləndirilməsi məqsədilə uşaq-gənclər idman-şahmat məktəblərində 16 idman növü üzrə 52 sayda kütləvi idman tədbirləri keçirilib. Bu tədbirlərdə 32 min 585 nəfərə yaxın idmançı iştirak edib”.
