Son yeniləmə: 2 İyul 2022 10:26
Bayraqdar.info – Almatıda Milli Dombıra Günü tədbiri keçirilib. Bayraqdar.info-nun media tərəfdaşı olan Türkel Media Qrupunun qardaş Qazaxıstandan verdiyi xəbərə görə, iyulun 1-də Almatı şəhərindəki Respublika Dostluq Evində Milli Dombıra Gününə həsr olunmuş “Ən dombıra, jür dombıra, küy dombıra” adlı bayram tədbiri keçirilib.
Tədbirdə Qazaxıstanın incəsənət ustaları, tanınmış küyilər və ənənəvi mahnı ifaçıları, o cümlədən Güney paytaxtının etnomədəni mərkəzlərinin nümayəndələri iştirak edib.
Təşkilatçılar Respublika Dostluq Evi və Qazaxıstan Azərbaycanlıları Assosiasiyası olub.
Qazaxıstan Parlamenti Məclisinin millət vəkili, Qazaxıstan Azərbaycanlıları Assosiasiyası İctima Birliyinin rəhbəri Əbülfəz Xamedov günün əhəmiyyəti ilə bağlı fikirlərini bildirib:
– Dombıra sevgisi bizi bu gün nəinki bu gözəl küylərə qulaq asmaq, hətta müasir dövrdə bu musiqi alətinin populyarlaşması ilə bağlı fikirlərimizi bildirməyə sövq etdi. 2018-ci il iyunun 13-də Qazaxıstan Prezidenti Milli Dombıra Gününün qeyd edilməsi haqqında Sərəncam imzalayıb. Bu əlamətdar günün iyulun ilk bazar günü qeyd olunması qərara alınıb. Ona görə də biz azərbaycanlılar bu gün milli mədəniyyəti və özünəməxsusluğu qoruyub saxlamaq və yaşatmaq ideyası ətrafında cəmiyyətin daha da möhkəmlənməsi üçün Dombıra Gününün qeyd edilməsinin təşkilatçısı kimi çıxış etdik.
Daha sonra Ə.Xamedov deyib: “Məlum olduğu kimi, qədim zamanlardan musiqi və mahnılar köçəri xalqın həyatında böyük rol oynamışdır. Çöl havaları ilə yeni həyatın doğulması müşayiət olunurdu, lirik melodiyalara gedən yolda onları müşayiət etdikləri kimi. Dombıra qazax xalqının simvolu adlandırıla bilən əsas musiqi alətlərindən biri hesab olunur. Bu alətin bir çox xalqlarda analoqları var. Rus mədəniyyətində formaca oxşar dumra, tacik mədəniyyətində dumrak, özbək mədəniyyətində dutara bənzər dumbıra, dumbrak, qırğız mədəniyyətində komuz, türkmən mədəniyyətində dutar, baş, dumbıra, başqırd mədəniyyətində dumbıra, Azov dənizi noqay mədəniyyətində dombıra, Azərbaycanda, Türkiyədə saz. Biz hər zaman əcdadlarımızın irsini örnək almağı dəstəkləyəcəyik”.
Qeyd edilib ki, tədbirin məqsədi gənc nəsildə qazax xalqının mədəni irsi olan və əsrlər boyu nəsildən-nəsilə ötürülən ənənəvi dombıraya maraq hissinin aşılanması, gəncləri milli ənənələrin ayrılmaz hissəsi olan musiqi sənəti ilə tanış etməkdir. O baxımdan bildirilib ki, bu cür tədbirlər davam etdiriləcək.
