Son yeniləmə: 28 İyun 2022 08:17
Vüqar İskəndərov: Bu, bizim həm qurucu xalq, həm də bu torpaqların gerçək sahibləri olduğumuzu təsdiqləyir
Bayraqdar.info – “Məlum olduğu kimi, əsası Ulu öndər Heydər Əliyev tərəfindən qoyulan və Prezident İlham Əliyev tərəfindən davam etdirilən siyasət nəticəsində Azərbaycan bütün sahələrdə uğurlar qazanıb, iqtisadi inkişaf baxımından yüksək nəticələr əldə edib. Məhz bu uğurlar nəticəsində Azərbaycan qüdrətli dövlətə çevrilib. İqtisadi imkanlarımızın artması bizə digər sahələrdə də mühüm addımlar atmağa imkan verib”.
Bunu bayraqdar.info-ya özəl açıqlamasında Milli Məclisin deputatı Vüqar İskəndərov deyib.
Deputat qeyd edib ki, qazanılan uğurlar və yüksək iqtisadi göstəricilər 2020-ci ilin 44 günlük Vətən müharibəsində əldə edilən qələbədə də əhəmiyyətli rol oynadı: “İqtisadi imkanlarımızdan güc alan işlər, güclü ordu quruculuğu Vətən müharibəsində öz sözünü dedi. Torpaqlarımız düşmən işğalından azad edildi”.
Deputat bildirib ki, eyni zamanda, işğaldan azad edilmiş torpaqlarda həyata keçirilən işlər zamanı da bu vaxta kimi qazandığımız uğurlar, iqtisadi nailiyyətlər öz sözünü deyir və deyəcək: “Cənab Prezident İlham Əliyevin işğaldan azad edilmiş rayonlara səfərləri yeni obyektlərin istifadəyə verilməsi, yaxud təməlinin qoyulması ilə yadda qalır”.
V.İskəndərov bildirib ki, bu, dövlət başçısının iyunun 26-da Göygöl, Kəlbəcər və Laçın rayonlarına səfəri zamanı da özünü bir daha göstərdi: “Məlum olduğu kimi, dövlətimizin başçısı Göygöl rayonunda Toğanalı-Kəlbəcər avtomobil yolunun 13-cü kilometrliyində inşa edilən iki tunelin tikintisi ilə tanış olub, Kəlbəcər rayonunda yeni tikilmiş “Kəlbəcər-1” Kiçik Su Elektrik Stansiyasının və Müdafiə Nazirliyinin “N” saylı hərbi hissəsinin açılışlarında iştirak edib, Kəlbəcər-Laçın avtomobil yolunun inşası və Laçın rayonunda 110 kV-luq “Qorçu” elektrik yarımstansiyasında aparılan işlərlə tanış olub. Cənab Prezidentə səfər zamanı Laçın rayonunda “Həkəriçay” su anbarı layihəsi təqdim edilib. Prezident İlham Əliyev Laçın Beynəlxalq Hava Limanının tikintisi ilə də tanış olub. Dövlətimizin başçısına Kəlbəcər şəhərinin baş planı təqdim edilib. Prezident İlham Əliyev həmçinin Kəlbəcər İşğal və Zəfər muzeyləri kompleksinin, Kəlbəcər Rəqəmsal İdarəetmə Mərkəzinin, Kəlbəcər rayonunda su istehsalı zavodunun təməlini qoyub, tikilməkdə olan “Çıraq-1” kiçik su elektrik stansiyasında olub. Burada dövlətimizin başçısına hazırda rayonda 5 yerdə inşa edilən elektrik stansiyaları barədə məlumat verilib. Prezident İlham Əliyev Kəlbəcər rayonunda İstisu sanatoriyasının da təməlini qoyub”.
“Göründüyü kimi, Azərbaycan dövləti torpaqların işğaldan azad edilməsi zamanı göstərdiyi qətiyyəti eyni zamanda postmüharibə dövründə həmin yerlərdə tikinti-quruculuq işlərində də göstərir. Onu da deyim ki, işğaldan azad edilmiş ərazilərdə postmüharibə dövründə görülən işlər də bizim həm qurucu xalq, həm də bu torpaqların gerçək sahibləri olduğumuzu təsdiqləyir”, – deyə deputat əlavə edib.
