Son yeniləmə: 24 İyun 2022 10:57
Bayraqdar.info – Cəlilabad Suvarma Sistemləri İdarəsi 11 min 805 hektar əkin sahəsinin suvarılması üçün mənbə olaraq Cənubi Muğan kanalı və 3 ədəd su anbarından istifadə edir. Bunlar İncəçay, Cəfərxanlı və Göytəpə su anbarlarıdır. Ötən illə müqayisədə hər üç anbarda kifayət qədər su toplanıb. Anbarların əsas əhəmiyyəti ondan ibarətdir ki, suvarmanın qızğın vaxtında suya tələbat artarsa, anbarların suyundan istifadə edilir.
Bu barədə bayraqdar.info-ya iyunun 24-də Azərbaycan Meliorasiya və Su Təsərrüfatı Açıq Səhmdar Cəmiyyətinin mətbuat katibi Dilqəm Şərifov məlumat verib.
Onun sözlərinə görə, ümumilikdə anbarlar vasitəsilə 1 min 700 hektar ərazi suvarıla bilir: “Bundan başqa, idarənin balansında 12 ədəd nasos stansiya da fəaliyyət göstərir. Bunlardan, 10-u dizel yanacağı ilə, 2-si isə elektriklə işləyir. Suvarmanın mütəşəkkil aparılması üçün Cəlilabad Suvarma Sistemləri İdarəsi tərəfindən torpaq məcralı kanallarda lildən təmizləmə işləri daimi olaraq davam edir”.
Qeyd edilib ki, ötən il əsaslı təmir planına uyğun olaraq mexaniki kanalın 500 metr hissəsində təmir işləri həyata keçirilib: “Bundan başqa, 34 ədəd hidrotexniki qurğu və 4 ədəd nasos stansiya təmir olunub. İdarənin balansında olan 106 ədəd subartezian quyusundan isə əhalinin suvarma və içməli suya olan tələbatı üçün istifadə edilir. Bu il əsaslı təmir planında Muğan torpaq kanalının 1500 metrində betonlama işinin davamı nəzərdə tutulub ki, bununla da kanalın xidməti ərazisində olan torpaq sahələrinin suvarılmasında su itkisi minimuma endiriləcək”.
Bildirilib ki, Cəlilabad Suvarma Sistemləri İdarəsinin suvarılan 11 min 805 hektar əkin sahəsindən 7 min 100 hektarı taxıl, 12 min hektarından çoxu üzüm, 635 hektarı yem bitkisi, 100 hektarı pambıq, 240 hektarı həyətyanı sahə, 2515 hektarı meyvə- tərəvəz və bostan bitkiləridir.
