İlham Əliyev özbək sənətçilərlə söhbətdə ciddi ismarıc verdi – VİDEO

Bayraqdar.info – Xəbər verdiyimiz kimi, Prezident İlham Əliyevin qardaş Özbəkistana 21-22 iyunda gerçəkləşmiş səfəri başa çatıb. Səfərin son günündə Özbəkistan Prezidenti Şavkat Mirziyoyev Azərbaycan Prezidentinin şərəfinə qəbul təşkil edib. Qəbulda Özbəkistan incəsənət ustaları da öz məharətlərini göstəriblər. Sonda prezidentlər sənətçilərə yaxınlaşaraq onlarla söhbət edib, şəkil çəkdiriblər.

İlham Əliyevin Özbəkistana səfəri uğurla başa çatıb

Azərbaycan Prezidentinin Özbəkistanlı sənətçilərə Azərbaycan dilində müraciət etməsi, söhbət zamanı səsləndirdiyi fikirlər həm qardaş ölkədə, həm də ümumilikdə türk dünyasında yaxşı mənada həyəcana səbəb olub. Bunu nəzərə alaraq Prezidentin sözügedən çıxışını təqdim edirik. Qeyd edək ki, görüntünü AZƏRTAC yayıb.

Prezident İlham Əliyev: “Qardaşım Şavkat Miromonoviçin bütün dediklərini mən anladım, tərcüməçiyə ehtiyac qalmadı. Mənim dövlət səfərim bu gün başa çatır. Dünən Daşkənddə, bu gün Xivədə, Ürgəncdə, Xarəzm vilayətində olmağımdan çox məmnunam. Dünən və bu gün bir daha gördüm ki, xalqlarımız bir-birinə nə qədər yaxındır. Mədəniyyətimiz, incəsənətimiz, ümumiyyətlə, xalqlarımızın kökləri birdir. Bu gün Azərbaycan dilində oxunan mahnılar, nəğmələr sanki Azərbaycan müğənniləri tərəfindən ifa olundu. Heç bir ləhcə, şivə yoxdur. Bu, nəyi göstərir? Xalqlarımızın birliyini. Siz Türk mədəniyyətimizi tərənnüm edən ifaçılar, sənətkarlar və mədəniyyət ustadları bizim fəxrimizsiniz”.