Son yeniləmə: 21 İyun 2022 15:04
Bayraqdar.info – Mədəniyyət Nazirliyi Vətən müharibəsindəki tarixi zəfərə ithaf olunan ədəbi müsabiqə elan edib.
Bu barədə bayraqdar.info-ya iyunun 21-də Mədəniyyət Nazirliyindən məlumat verilib.
Qeyd edilib ki, müsabiqənin təşkilində əsas məqsəd Azərbaycanın hərb salnaməsinə və dövlətçilik tarixinə qızıl hərflərlə yazılmış “Dəmir yumruq” əməliyyatı nəticəsində qazanılmış şanlı qələbənin gələcək nəsillər üçün bədii mətnlər vasitəsilə əbədiləşdirilməsi, Vətən müharibəsindəki böyük zəfərin bədiiləşdirilməsi və İkinci Qarabağ müharibəsinin qəhrəmanlarının obrazlaşdırılması, habelə dünya ictimaiyyətini ədəbi əsərlər vasitəsilə bu mövzuda məlumatlandırmaqdan ibarətdir.
Məlumatda vurğulanlıb ki, əsərlərdə Vətən müharibəsinin təsviri, 44 gün ərzində hərb meydanında, arxa cəbhədə, beynəlxalq arenada yaşanan proseslərin əks etdirilməsi arzuolunandır.
Qeyd edək ki, müsabiqə 3 ədəbi janr – roman, dram və mənzum hekayə janrları üzrə keçirilir: “Müsabiqədə yalnız peşəkar yaradıcı şəxslər (tanınmış imza sahibləri) iştirak edə bilərlər. Əsərlər orijinal və daha əvvəl heç yerdə çap olunmamalı və yayımlanmamalıdır. Hər bir müəllif müsabiqəyə yalnız bir əsər təqdim edə bilər. Əsərlər Azərbaycan Respublikasının dövlət dilində yazılmalıdır. Əsərlər bir şəxs tərəfindən yazılmalıdır. Müştərək iş qəbul olunmur. Əsərlərdə tarixi faktlar təhrif olunmamalıdır”.
O da bildirilib ki, müsabiqəyə təqdim ediləcək əsərlərin həcminə dair məhdudiyyət yoxdur: “Hər ədəbi janr üzrə bir qalib elan olunacaq. Əsərin üz qabığında (ilk səhifədə) müəllif özü haqqında məlumatı, əlaqə vasitəsini (Telefon nömrəsi və e-mail), hansı ədəbi janr üzrə iştirakçı olduğunu qeyd etməlidir. Əsərin mətni üçün tələblər – şriftin qarnituru “Arial” 12, sətirlər arası interval 1, MS Word faylı”
Məlumat üçün bildirək ki, müsabiqənin roman janrı üzrə qalibi 10 min manat pul mükafatı və Şuşanın 270 illiyi münasibətilə təsis olunan “Xatirə nişanı” ilə təltif olunacaq. Dram janrı üzrə qalib 5 manat pul mükafatı və müsabiqənin fəxri diplomu, mənzum hekayə janrı üzrə qalib isə 5 min manat pul mükafatı və nazirliyin fəxri fərmanı ilə təltif olunacaq.
Nazirliyin məlumatında o da qeyd edilib ki, qalib roman min tirajla çap olunacaq və ingilis dilinə tərcümə ediləcək: “Eyni zamanda nəşrin 300 nüsxəsi müəllifə hədiyyə ediləcək və hədiyyə nüsxələrin respublika üzrə satışı təşkil ediləcək. Qalib dram əsərinin tamaşası hazırlanacaq və nümayiş etdiriləcək. Ən yaxşı mənzum hekayələr toplu şəklində çap olunacaq. Müsabiqəyə təqdim olunan bütün əsərlər və müəlliflər şifrələnəcək. Əsərlərin qiymətləndirilməsi iki mərhələdən keçəcək”.
Qiymətləndirməyə gəlincə, əsərlər Ekspertlər Şurası və Komissiya üzvləri tərəfindən oxunacaq, onların mövzu, bədii və peşəkar yaradıcılıq baxımından dəyərləndirilməsi aparılacaq: “Ekspertlər Şurası tərəfindən ən yaxşı əsərlərin qısa siyahısı tərtib olunub Komissiyaya təqdim ediləcək. Ekspertlərin müəyyən edəcəyi qısa siyahı Komissiyaya təqdim olunmaqla yanaşı, ictimai müzakirəyə çıxarılacaq. Hər janr üzrə qısa siyahı 5 əsərdən ibarət olacaq”.
Xatırladaq ki, müsabiqəyə romanların qəbulu 30 dekabrda, dram əsərlərinin qəbulu 30 noyabrda və mənzum hekayələrin qəbulu isə 30 oktyabrda başa çatacaq: “Müsabiqə şərtlərinə cavab verməyən əsərlər Ekspertlər Şurası tərəfindən qəbul edilməyəcək. İştirakçılar tərəfindən əsərlər e-mail: n.azakov@culture.gov.az elektron poçt ünvanına göndərilməlidir”.
O da xüsusi olaraq qeyd edilib ki, Nazirlik müsabiqəyə təqdim olunan əsərlərin müəlliflik hüququnu qorumaqla çapı və yayımını, onların əsasında filmin çəkilməsini və tamaşanın hazırlanmasını həyata keçirə bilər.
