İlham Məmmədov: Bu Fərman hərbçilərin icbari sığorta sahəsində daha etibarlı sosial müdafiəsinə xidmət edir
Bayraqdar.info – “Azərbaycanda bütün sahələrdə, o cümlədən sosial sahədə davamlı addımlar atılır, islahatlar həyata keçirilir. Təbii ki, bütün bunlar ölkənin daha da güclənməsinə, Azərbaycan vətəndaşlarınn hərtərəfli diqqət və qayğı ilə əhatə olunmasına hesablanmış addımlardır”.
Bunu bayraqdar.info-ya özəl açıqlamasında Milli Məclisin Əmək və sosial siyasət komitəsinin üzvü İlham Məmmədov deyib.
Deputat qeyd edib ki, Prezident İlham Əliyevin tapşırıqlarına uyğun olaraq son illər ölkədə aparılan geniş miqyaslı sosial islahatlar bütün sahələrə öz müsbət təsirini göstərir: “Bu bir həqiqətdir ki, sosial dövlət olan Azərbaycanda əhalinin bütün təbəqələri dövlətin diqqət və qayğısı ilə əhatə olunub. Reallaşdırılan sosial islahatlardan hər kəsə pay düşüb və bu addımlar davamlı xarakter daşıyır. Eyni zamanda, onu da xüsusi olaraq vurğulamalıyıq ki, vətən uğrunda canından keçən şəhidlərin ailələri, o cümlədən qazilər və müharibə veteranları, hərbçilər şəxsən cənab Prezidentin diqqət mərkəzindədir”.
İ.Məmmədov vurğulayıb ki, dövlət başçısının 18 iyun 2022-ci il tarixli Fərmanı bu istiqamətdə atılan növbəti addımdır: “Qeyd edim ki, bu Fərman dövlət icbari şəxsi sığorta sahəsində sığortaolunanların, o cümlədən hərbçilərin rifahının yaxşılaşdırılması və daha etibarlı sosial müdafiəsinin təmin olunmasına xidmət edir”.
Deputat bildirib ki, Prezidentin 2021-ci ilin mayında imzaladığı Fərmanla dövlət icbari şəxsi sığortası sahəsində səlahiyyətlər 2022-ci il yanvarın 1-dən Əmək və Əhalinin Sosial Müdafiəsi Nazirliyinə həvalə edilib: “Həmin vaxta qədər dövlət icbari şəxsi sığorta üzrə sığorta hadisələrinə görə ödənişin verilməsi isə Dövlət Sığorta Kommersiya Şirkətinin öhdəliyi kimi müəyyən olunmuşdu. Yeni, 18 iyun 2022-ci il tarixli Fərmanla bu sahədə dəyişiklik edilib. Belə ki, Fərmanla dövlət icbari şəxsi sığorta olunanla bağlı sığorta hadisəsinin baş verdiyini təsdiq edən sənədin tarixi 2021-ci il yanvarın 1-dək olan dövrə aid olduqda sığorta ödənişini Dövlət Sığorta Kommersiya Şirkəti həyata keçirəcək. Sığorta hadisəsinin baş verdiyini təsdiq edən sənədin tarixi 2021-ci ilin 1 yanvarından sonraya aid olduqda isə sığorta ödənişini Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondu verəcək”.
Millət vəkili bildirib ki, bu da dövlət icbari şəxsi sığortası sahəsində idarəetmənin səmərəliliyinin artırılması istiqamətində növbəti mühüm addım olmaqla, sığortaolunanların maraqlarının dolğun təminatına, vətəndaş məmnunluğuna nail olunmasına imkan yaradır: “Onu da qeyd edim ki, dövlət icbari şəxsi sığortası sahəsində səlahiyyətlər bu ilin əvvəlindən Əmək və Əhalinin Sosial Müdafiəsi Nazirliyinə həvalə edildikdən sonra bu sahədə köklü islahatlar aparılır. Sığorta ehtiyatlarının effektiv idarə olunması və bu istiqamətdən əldə olunan gəlirlərin şəhid ailələrinin və müharibə əlillərinin sosial müdafiəsi tədbirlərinə yönəldilməsi həmin islahatların prioritetlərindəndir”.
