Son yeniləmə: 21 İyun 2022 13:55
Bayraqdar.info – İyunun 25-də Göyçayda “Aqroturizm və Məşğulluq” (#GöyçayFest) festivalı olacaq. Festival Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin Göyçay Peşə Hazırlığı Mərkəzi və Kənd Təsərrüfatı Nazirliyinin Meyvəçilik və Çayçılıq Elmi-Tədqiqat İnstitutunun birgə təşkilatçılığı ilə keçiriləcək.
Bu barədə bayraqdar.info-ya Dövlət Məşğulluq Agentliyindən məlumat verilib.
Bildirilib ki, festivalda kənd təsərrüfatı, ictimai iaşə və aqroturizm istiqamətində maraqlı subyektlərin sərgiləri təşkil olunacaq “Həmçinin bu istiqamətlərdə fəaliyyət göstərən sahibkarlıq subyektlərinin məhsulları və həyata keçirilmiş layihələr nümayiş etdiriləcək. Festivalda iştirakçıları aqroturizmçilər və işəgötürənlərin nümayiş etdirdikləri məhsullarla tanış olmaq imkanı qazanacaq, təşkil olunacaq satış sərgisində yerli sahibkarların məhsullarını əldə edə biləcəklər”.
Tədbirin keçiriliməsinə həmçinin Dövlət Turizm Agentliyi, Göyçay Rayon İcra Hakimiyyəti, Kiçik və Orta Biznesin İnkişafı Agentliyi, BMT-nin Ərzaq və Kənd Təsərrüfatı Təşkilatı, “Aznar” QSC, “Göyçay-Süd” ASC və Azərbaycanda Qadın Sahibkarığının İnkişafı Assosiasiyası da təşkilatı dəstək verirlər: “Məqsəd regionda aqroturizm və ekoturizmin, eləcə də milli qastronomiyanın inkişafına dəstək olmaq, yerli sahibkarların aqroturizmə marağını artırmaq, aqroturizm idarəetmə təcrübəsini təşviq etməklə əhalinin məşğulluq imkanlarını genişləndirməkdir. Həmçinin peşə mərkəzi müdavimləri, gənclər üçün əlavə gəlir gətirən, həmçinin iqtisadi dayanıqlılığı özündə birləşdirən turizm növlərini inkişaf etdirməkdir”.
