Son yeniləmə: 20 İyun 2022 07:45
Bayraqdar.info – Türkiyənin Antalya şəhərində keçirilən qılıncoynatma üzrə Avropa çempionatında qadın sablyaçıların şəxsi yarışında mükafatçılar müəyyənləşib. Qrup mərhələsini 5 qələbə ilə başa vuran Azərbaycan milli komandasının lideri Anna Başta uğurlu çıxışının davamını pley-offda da gətirib.
Bu barədə bayraqdar.info-ya Azərbaycan Qılıncoynatma Federasiyasından məlumat verilib.
Bildirilib ki, pley-offda keçirdiyi ilk görüşdə Rumıniya təmsilçisi Sabina Martisi 15:8 hesabı ilə məğlub edən Anna, 8-liyə yüksəlmək uğrunda keçirilən görüşdə Azərbaycanın digər təmsilçisi Palina Kaspiaroviçə 15:14 hesabı ilə qalib gəlib: “ 1/4 finalda ukraynalı olimpiya çempionu Olqa Xarlanı mübarizədən kənarlaşdıran (15:14) Anna Başta yarımfinalda polşalı Suzanna Pieslara 15:6 hesabı qalıb gələrək finala yüksəlib. Həlledici görüşdə İtaliya sablyaçısı Rossella Qreqorioya 15:9 hesabı ilə qalib gələn Anna Başta Avropa çempionatının qızıl medalını qazanıb”.
Məlumata əsasən, digər təmsilçilərimizdən Səbinə Kərimova və Palina Kaspiaroviç Avropa çempionatının 1/8 finalında mübarizəni dayandırıb: “Valeriya Bolşakova isə 32-liyə yüksəlmək uğrunda keçirilən pley-off görüşündə uduzub”.
