Son yeniləmə: 16 İyun 2022 09:24
Bayraqdar.info – İyunun 15-də Kiçik və Orta Biznesin İnkişafı Agentliyinin (KOBİA) dəstəyi ilə “MiniBoss Business School Baku”nun şagirdləri arasında sayca 2-ci Milli Startap Çempionatı keçirilib.
Bu barədə bayraqdar.info-ya KOBİA-dan məlumat verilib.
Məlumata əsasən çempionatda 6-17 yaş arasında uşaqların təmsil olunduğu 12 komanda peşəkar münsiflər heyəti qarşısında öz biznes layihələrini – startaplarını təqdim ediblər: “Layihələr qida, kimya, İKT və sosial sahələri əhatə edir. 2-ci Milli Çempionatda qalib gəlmiş komandalar “MiniBoss Business Scholl Baku”nu Dünya Startap Çempionatında təmsil edəcək. Ümumiyyətlə, milli çempionatda iştirak etmiş bütün komandalara sertifikatlar verilib”.
Qeyd edilib ki, “Miniboss Business School” beynəlxalq təhsil şəbəkəsi uşaq və yeniyetmələrə biznesin əsaslarının tədris olunduğu biznes məktəbdir və dünyada 50-dən çox filialı var: “2020-ci ildən Bakıda fəaliyyət göstərən “Miniboss Business School Baku” uşaqların, yeniyetmə və gənclərin erkən yaşlardan sahibkarlıq sahəsində ilkin bilik və bacarıqlara yiyələnməsini tədris edir”.
