Son yeniləmə: 14 İyun 2022 10:05
Emin Həsənli: Bu təcrübədən digər dövlətlər də yararlanmağa çalışır
Bayraqdar.info – “Azərbaycan Silahlı Qüvvələrinin təlimlərdə iştirak etməyinin əhəmiyyəti böyükdür. Təlimlər aylarla hazırlanan, öyrədilən dərslərin sınağıdır. Təlimlərdə uğurla çıxış edən hərbçilər döyüşlərdə də uğur qazanırlar. Bu, min illər boyu sınaqdan keçərək özünü təsdiq edib”.
Bunu bayraqdar.info-ya özəl açıqlamasında “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli deyib.
Onun sözlərinə görə, hərbi təlimlər Azərbaycan Ordusunun daha da peşəkar səviyyədə inkişafına dəstək olur: “Bu cür təlimlər ordunun həm döyüş, həm də mənəvi-psixoloji hazırlığı, hərbçilər və qoşunlar arasında koordinasiyalı fəaliyyət baxımından olduqca önəmlidir”.
Azərbaycan hərbçilərinin qardaş ölkə Türkiyədə keçirilən “Efes-2022” adlı beynəlxalq təlimdəki iştirakını dəyərləndirən hərbi ekspert deyib ki, ümumilikdə beynəlxalq təlimlərin əhəmiyyəti böyükdür: “Konkret olaraq “Efes-2022” beynəlxalq təlimlərinə gəlincə, hesab edirəm ki, Azərbaycan Ordusu burada təkcə nəyisə öyrənməyib, həm də öz təcrübəsini bölüşüb. Məsələ burasındadır ki, iyirmi birinci əsrin ən böyük savaşlarından biri Qarabağda olub. Bu savaşda Azərbaycan Ordusunun gücü və bacarığı bütün dünya tərəfindən izlənildi. Azərbaycan Ordusu qısa bir zamanda böyük bir başarı əldə edərək tarix yazdı. Yəni Azərbaycan Ordusunun kifayət qədər böyük təcrübəsi var. Bu təcrübədən digər dövlətlər yararlanmağa, onu öyrənməyə çalışırlar”.
