Son yeniləmə: 13 İyun 2022 11:57
Bayraqdar.info – Yerli şirkətlər üçün daha bir imkan yaradılır. Belə ki, 16-18 iyun tarixlərində “Baku Crystal Hall”da “Partners and Business” Baku 2022 – yerli şirkətlərin tanıtım sərgisi keçiriləcək.
Bu barədə bayraqdar.info-ya iyunun 13-də Kiçik və Orta Biznesin İnkişafı Agentliyindən (KOBİA) məlumat verilib.
Bildirilib ki, sərgi KOBİA, Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi, Azərbaycan Sahibkarlar (İşəgötürənlər) Təşkilatları Milli Konfederasiyası və “Marsol” MMC-nin birgə təşkilatçılığı, “Kapital Bank”ın tərəfdaşlığı ilə təşkil olunacaq: “Sərgidə sənaye, kənd təsərrüfatı, qida, İKT, təhsil, inşaat, logistika, tekstil və digər sahələrdə fəaliyyət göstərən yerli şirkətlər tərəfindən xidmətlər, idxal, ixrac və istehsal olunan məhsullar nümayiş olunacaq. 200-ə yaxın şirkətin iştirakının nəzərdə tutulduğu sərginin məqsədi Azərbaycan şirkətlərinin daha geniş tanıdılması, bazarlara çıxış imkanlarının genişləndirilməsi, yerli şirkətlər arasında biznes tərəfdaşlığının inkişaf etdirilməsi və yeni əməkdaşlıq əlaqələrinin qurulmasıdır”.
Qeyd edilib ki, sərgi çərçivəsində sahibkarların və dövlət qurumlarının iştirakı ilə “Baku Crystal Hall”un mətbuat zalında beş panel iclasdan ibarət konfrans keçiriləcək: “Sərgidə ziyarətçi qismində iştirak ödənişsizdir. İştirak etmək üçün əvvəlcədən bu sayta daxil olaraq və ya sərgi günü məkanda qeydiyyatdan keçə bilərsiniz”.
