Son yeniləmə: 13 İyun 2022 11:59
Bayraqdar.info – Türk ədəbiyyatının görkəmli nümayəndələrindən biri Ömər Seyfəddinin “Hekayələr” kitabı alman dilində təqdim edilib. Kitab Beynəlxalq Türk Mədəniyyəti və İrsi Fondunun Vyanada “Türk dünyasını birləşdirən ədəbi körpü” adlı layihəsi çərçivəsində nəşr olunub.
Bu barədə bayraqdar.info-ya iyunun 13-də Fonddan məlumat verilib.
Bildirilib ki, Fond tərəfindən nəşr edilmiş kitabın təqdimat mırasimi Fondun, Azərbaycanın və Türkiyənin Avstriyadakı səfirliklərinin birgə təşkilatçılığı ilə Vyana Yunus Emre İnstitutunda keçirilib: “Təqdimat mərasimində Beynəlxalq Türk Mədəniyyəti vəİrsi Fondunun prezidenti Günay Əfəndiyeva, Azərbaycanın Avstriyadakı səfiri Rövşən Sadıqbəyli, Türkiyənin Avstriyadakı səfiri Ozan Ceyhun, Vyana Yunus Əmrəİnstitutunun rəhbəri Ayşe Yorulmaz, araşdırmacı-yazar Orxan Araz, Türkiyənin Erciyez Universitetinin professoru Hülya Argunşah və başqaları iştirak ediblər”.
Məlumata əsasən tədbirdə çıxış edən Türkiyənin Avstriyadakı səfiri Ozan Ceyhun bildirib ki, türk ədəbiyyatının inkişafına əhəmiyyətli töhfələr verən Ömər Seyfəddin qısa hekayələr janrının önəmli imzalarından biridir: “Onun Türkiyənin imperatorluqdan cümhuriyyətə keçid dönəmində milli dil və bu dillə meydana gələn ədəbiyyatın formalaşmasında onun xüsusi rolu olmuşdur”.
Beynəlxalq Türk Mədəniyyəti və İrsi Fondunun prezidenti Günay Əfəndiyeva öz çıxışında avstriyalı oxucuları türk dünyasını birləşdirən ədəbi incilərlə görüşdürdüklərini bildirib “Fondun prezidenti kiçik həcmli hekayələri iləədəbiyyatda güclü iz buraxan Ömər Seyfəddinin əsərləri və ümumiyyətlə, ədəbi fəaliyyətilə Türk dilinin özləşməsinə çalışdığını, türkçülük axınının qurucu və öncüllərindən biri olduğunu qeyd edib. Günay Əfəndiyeva Beynəlxalq Türk Mədəniyyəti vəİrsi Fondu tərəfindən Türk dünyasının görkəmli şəxsiyyətlərinin ədəbi irsinin beynəlxalq aləmdə tanıtımı üçün layihələrin həyata keçirildiyini, təşkilatın məqsədinin Türk xalqlarının tarixini, adət-ənənələrini, musiqisini, ədəbiyyatını, memarlığını, sənətini, ümumiyyətlə mədəni irsini qorumaq, təbliğ etmək, gələcək nəsillərə ötürmək olduğunu dilə gətirib”.
Tədbirdə Almaniyada uzun illər yaşayan araşdırmaçı yazar Orxan Araz , tərcüməçi German Kohl, Ömər Seyfəddinlə bağlı elmi məqalələri ilə tanınan Türkiyənin Erciyes Universitetinin müəllimi, professor Hülya Argünşah görkəmli yazıçının cəmi 36 il yaşamasına baxmayaraq, türk ədəbiyyatına böyük töhfələr verdiyini vurğulayıb, Beynəlxalq Türk Mədəniyyəti vəİrsi Fondunun Türk ədəbiyyatının növbəti dəfə Avropada tanıdılması yönündə çalışmalarını yüksək qiymətləndiriblər.
Təqdimatda TRT tərəfindən Fondun himayəsi ilə çəkilmiş Ömər Seyfəddinin həyat və yaradıcılığına həsr olunmuş sənədli film göstərilib. Sonda Azərbaycanın Xalq artisti Mehriban Zəki Türk mədəniyyətinin incilərindən seçmələr ilə çıxış edib.
