Son yeniləmə: 8 İyun 2022 10:55
Əhməd Şəfəqli (Orucov) – Güney Ural
Bayraqdar.info – 2022-ci ilin 25-26 aprelində Kazanda dostlar ilə tatar ədiblərinin aylıq “Kazan odları” dərgisinin 100 yaşını, tanınmış tatar ədibi və ictimai xadimi Galimjan İbrahimovun 135 illik yubileyini, dahi tatar ədibi Gabdulla Tuqayın 136 illik yubileyini və tatar xalqının “Tuğan tel” (“Doğma dil”) gününü qutladıq.
Dünya tatarlarını birləşdirən jurnalın 100 illiyi ilə bağlı Odlar Yurdu Azərbaycandan qardaş xalqa bayram sovqatı sayaq, sayğılı qardaşlarım Əkbər Qoşalı, İlqar Türkoğlu və İsmət Orucəliyev (Tatarıstan, Tüben Kama şəhəri) ilə birgə dərginin baş redaktorları olmuş tatar şairlərindən tərcümələrdən və dərginin hazırkı baş redaktoru Rüstəm Galiullinin hekayəsindən ibarət “Kazan odları – 100” adlı kitab hazırlamışdıq.
Bayram törənlərinə Saxadan gənc yakut şairi Gavriil Androsov, Qırğızıstandan xalq şairi Markabay Aamatov, Azərbaycandan şair İlqar Türkoğlu, Qazaxıstandan şair Sayat Qamşıger, Başqırdıstandan gənc yazar Ayqız Baymuxametov, Qaraçay-Çərkəz Respublikasının xalq şairi, əslən balkar olan Əsgər Doduyev dəvət olunmuşdular.
Odun, nurun bol olsun,
Hər vaxt, “Kazan utları”!
Səni qutlamaqdadır
Bütün Turan yurdları.
Həmişə arif görək,
Maarif işığında,
Qırğızı, balkarları,
Qazaxı, başqurdları.
Tatar da hər türk sayaq,
Özünə qardaş bilir,
Özünə bilir dayaq
Özbəyi, yakutları…
Yuzilliyin mübarək,
Tatar “Kazan odları”!..
İki qitə Turana
Hər ay vaxtlı-vaxtında
Çatar “Kazan odları”.
Bizim Azərbaycan da
Səninlə ədib tatar
Qardaşlarından xəbər
Tutar, “Kazan odları”.
Bizim üçün doğmasan,
Tatar “Kazan odları”!
İlbəil yox, günbəgün
Sənə sayğımız daha
Artar, “Kazan odları”!
Tatar aydınlarının
Öz tuğan dillərinə
Sevdasını görmüşəm…
Olarmı bundan böyük
Qazanc, “Kazan odları”?
Daha da uca ad-san
Qazan, “Kazan odları”!
Qul Şərifdən, Tuqaydan
Yazan, “Kazan odları”!
Yerdə Saman yolu tək,
Ürəkdən ürəklərə,
Səyyarə boyu yayıl,
Uzan, “Kazan odları”!
Sənin ilə fəxr edir
Turan, “Kazan odları”.
Odun heç zaman sönməz,
Yüz il məşəl tək yanan,
Duran “Kazan odları”!
