Son yeniləmə: 27 May 2022 15:54
Bayraqdar.info – “Tərxis Olunmuş Hərbçilərin Gəncləri Maarifləndirmə” İctimai Birliyi “Zəfər tariximizi yazan qəhrəmanlarımızın gənclər arasında təbliği” adlı layihənin icrasını uğurla yekunlaşdırıb.
İctimai Birlikdən bayraqdar.info-ya verilən məlumata görə layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi həyata keçirilib.
Bildirilib ki, əsas məqsədi ikinci Qarabağ müharibəsində qazanılan tarixi qələbənin gənclər arasında təbliği və ölkəmizin ərazi bütövlüyünün təmin edilməsi uğrunda şücaət göstərmiş döyüşçülərin gənc nəslə tanıdılmasından ibarət olan layihənin icra müddəti dörd ayı əhatə edib: “Layihə çərçivəsində Bakı şəhəri, Ağdam, Bərdə və Tərtər rayonlarında yeniyetmə və gənclərlə görüşlər keçirilib. Keçirilən görüşlərdə Qarabağ qaziləri, Rayon İcra Hakimiyyətlərinin məsul əməkdaşları, təhsil işçiləri, və ictimaiyyət nümayəndələri iştirak edib”.
Qeyd edilib ki, görüşlərə dəvət olunan qazilər və ehtiyatda olan hərbçilər şəhid olan döyüş yoldaşlarının eləcə də özlərinin keçdikləri döyüş yolundan, zəfər tariximizə gedən şərəfli yoldan danışıblar: “Onlar artıq cəmiyyət üçün məxfi sayılmayacaq uğurlu tapşırıqlar, keçdikləri döyüş yolları haqqında gənclərə məlumat veriblər. Azərbaycan Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi ilə Azərbaycan Ordusunun torpaqlarımızı işğaldan azad etməsi zamanı gösətrilən şücaətdən danışan natiqlər Silahlı Qüvvələrimizə olan inamı daha da möhkəmləndirməsi istiqamətində maarifləndirici söhbətlər aparıblar”.
Məlumata əsasən gənclər də öz növbəsində dövlətin qayğısını həmişə hiss etdiklərini, öz nailiyyətləri ilə onlara göstərilən etimadı layiqincə doğrultmağa çalışacaqlarını vurğulayıblar: “Gənclər 44 günlük savaşın – zəfər tarixinin yazıldığı günlərin canlı şahidləri olmalarından qürur duyduqlarını ifadə ediblər. Əminliklə bildiriblər ki, gənclər olaraq tariximizə, keçmişimizə və gələcəyimizə sahib çıxaraq qoruyacaq, gələcək nəsillərə ötürəcəklər”.
