Bayraqdar.info – Mayın 26-da Prezident İlham Əliyev və birinci xanım Mehriban Əliyeva Qarabağ və Şərqi Zəngəzur iqtisadi rayonlarına səfər edib.
Xəbəri Prezidentin Mətbuat xidməti yayıb.
Xəbərdə qeyd edilir ki, onlar ilk olaraq Horadiz-Cəbrayıl-Zəngilan-Ağbənd avtomobil yolunun tikintisi ilə tanış olublar. Bu yol Qarabağ və Şərqi Zəngəzur iqtisadi rayonlarının Güneyindən keçməklə Zəngəzur dəhlizinə, oradan da Naxçıvana gedib çıxacaq. Ümumi uzunluğu 123,6 km olan yolun 77 km-lik hissəsi altı, 46,6 km-lik hissəsi isə dörd hərəkət zolaqlı olacaq.
Daha sonra Prezident və xanımı Cəbrayıl rayonuna səfər edib. Onlar burada Horadiz-Ağbənd dəmir yolu xəttinin Soltanlı stansiyasının təməlqoyma mərasimində iştirak ediblər.
Soltanlı stansiyasından sonra dövlət başçısı və xanımı “Azərenerji” ASC-nin 330/110 kilovoltluq “Cəbrayıl” enerji qovşağının təməlqoyma mərasimində də iştirak edib.
Bundan sonra isə onlar Zəngilan rayonuna yollanıblar və burada Zəngilan Beynəlxalq Hava Limanında aparılan tikinti işlərinin gedişi ilə tanış olublar.
“Bildirildi ki, perronda torpaq işləri tamamlanıb, uçuş-enmə zolağında asfalt-beton işləri davam edir. Zolağın uzunluğu 3 min m, eni isə 60 m olacaq. Bu hava limanı bütün növ təyyarələri, o cümlədən ağır yük təyyarələrini qəbul edəcək.
“Aeroportun hava hərəkəti qülləsinin tikintisinin iyulda tamamlanması planlaşdırılır. Avqustun sonunda isə terminal binasında işlərin başa çatdırılması nəzərdə tutulur. Beynəlxalq standartlara uyğun inşa edilən terminal binası saatda 200 sərnişinə xidmət edəcək. Terminal daxilində VIP zallar, kafelər, tibb xidməti və ofis otaqları yaradılacaq. Avadanlıq və materiallar İtaliya, Almaniya və Türkiyədən gətirilib”, – deyə xəbərdə bildirilir.
“Qeyd edək ki, Zəngilan Beynəlxalq Hava Limanı Qarabağın mühüm nəqliyyat qovşağına çevrilməsini şərtləndirən əsas amillərdəndir. Həmçinin bu hava limanı Zəngəzur dəhlizinin hava nəqliyyatı infrastrukturu ilə gücləndirilməsi baxımından strateji əhəmiyyət kəsb edir. Görülən işlərin sürəti buranın beynəlxalq nəqliyyat-logistika habına çevriləcəyi günü yaxınlaşdırmaqdadır.
“Onu da deyək ki, işğaldan azad olunan ərazilərdə Füzulidəki hava limanından sonra beynəlxalq statuslu daha iki aeroport tikilməkdədir. Onlardan biri də Zəngilan hava limanıdır. Digəri isə Laçın rayonunun ərazisində inşa olunur.”
Prezidentin Mətbuat xidməti belə xəbər verir.
