Son yeniləmə: 23 May 2022 14:56
Bayraqdar.info – Məlum olduğu kimi Bakıda Azərbaycan-Türkiyə-Gürcüstan Parlamentlərinin Xarici Əlaqələr Komitələrinin üçtərəfli birgə görüşü keçirilir.
Mayın 23-də 23 xarici işlər nazirinin müavini Elnur Məmmədov həmin görüşdə iştirak etmək üçün ölkəmizdə səfərdə olan Türkiyə Böyük Millət Məclisinin Xarici Əlaqələr Komitəsinin sədri Akif Çağatay Kılıç və Gürcüstan Parlamentinin Xarici Komitəsinin sədri Nikoloz Samxaradze ilə görüşüb.
XİN-dən bayraqdar.info-ya verilən məlumata görə görüşdə Milli Məclisin Beynəlxalq münasibətlər və Parlamentlərarası əlaqələr Komitəsinin sədri Səməd Seyidov, habelə Türkiyə və Gürcüstanın ölkəmizdəki səfirləri iştirak ediblər: “Qonaqları səmimiyyətlə salamlayan nazir müavini Elnur Məmmədov, Azərbaycanın həm Türkiyə, həm də Gürcüstanla ikitərəfli əsasda mövcud olan yüksək səviyyəli strateji tərəfdaşlıq münasibətlərindən, habelə üçtərəfli formatda mövcud olan regional əməkdaşlıq formatından məmnunluqla bəhs edib. Ölkələrimizin, həmçinin beynəlxalq təşkilatlar çərçivəsində qarşılıqlı faydalı əməkdaşlığı vurğulanıb. Üç ölkə arasında yüksək səviyyəli siyasi dialoqla yanaşı, iqtisadi, ticarət, enerji, humanitar və s. sahələrdə əlaqələrin, habelə parlament ölçüsündə əməkdaşlığın dinamik inkişafı təqdir edilib”.
Məlumata görə, nazir müavini Elnur Məmmədov qarşı tərəfə bölgədə mövcud olan münaqişə sonrası vəziyyət, o cümlədən azad olunmuş ərazilərin minalardan təmizlənməsi, bərpa və quruculuq işləri, eyni zamanda sülh quruculuğu istiqamətində Azərbaycan tərəfindən görülən işlər, Brüsseldə liderlər səviyyəsində keçirilmiş görüşlər və onların nəticələri barədə məlumat təqdim edib: “Cari ildə ölkələrimiz arasında diplomatik münasibətlərin qurulmasının 30 illiyinin qeyd olunması münasibətilə silsilə tədbirlərin təşkil edildiyi vurğulanıb. Görüş zamanı üçtərəfli formatda əməkdaşlıq məsələləri, regional və beynəlxalq gündəliyin aktual mövzuları, həmçinin Ukraynadakı vəziyyət və qarşılıqlı maraq doğuran digər məsələlərlə bağlı fikir mübadiləsi aparılıb”.
