Son yeniləmə: 19 May 2022 13:55
Bayraqdar.info – İstanbul şəhərində Azərbaycanın Əmək və Əhalinin Sosial Müdafiəsi Nazirliyi ilə Türkiyənin Əmək və Sosial Müdafiə Nazirliyi arasında əməkdaşlıq üzrə Birgə Daimi Komissiyanın 10-cu iclası öz işinə başlayıb.
Bu barədə bayraqdar.info-ya mayın 19-da ƏƏSMN-dən məlumat verilib.
Bildirilib ki, iclasın açılışında nazir Sahil Babayev 19 May – Atatürkü Anma, Gənclik və İdman bayramı münasibətilə Türkiyənin əmək və sosial müdafiə naziri Vedat Bilginə və onun rəhbərlik etdiyi kollektivə təbrikini ifadə edib: “Azərbaycanla Türkiyə arasında ikitərəfli dostluq və qardaşlıq münasibətlərinin bütün sahələrdə uğurla inkişaf etdiyini vurğulayan S.Babayev bu inkişafın təmin edilməsində iki qardaş ölkənin dövlət başçılarının birgə səylərinin mühüm rola malik olduğunu diqqətə çatdırıb. O, Azərbaycanla Türkiyənin hər zaman bir yerdə olduğunu, İkinci Qarabağ müharibəsi zamanı da bunu bir daha bütün dünyaya nümayiş etdirdiyini qeyd edib. Şuşa Bəyannaməsinin imzalanması ilə Azərbaycan-Türkiyə münasibətlərinin müttəfiqlik səviyyəsinə yüksəldiyini vurğulayıb”.
Məlumata əsasən S.Babayev həmçinin Türkiyə ilə əmək, məşğulluq və sosial müdafiə sahəsində əlaqələrin daha da gücləndirilməsinin mühüm əhəmiyyətini qeyd edib. Nazir ölkəmizdə əmək, məşğulluq və sosial müdafiə sahəsində aparılan islahatlar barədə məlumat verib. Birgə Daimi Komissiyanın iclasının da iki nazirlik arasında əməkdaşlığın daha da genişlənməsinə xidmət edəcəyinə əminliyini ifadə edib.
“V.Bilgin Azərbaycanın Türkiyə üçün dost və qardaş ölkə olduğunu vurğulayıb. İki ölkənin hər zaman bir-birinin yanında olduğunu, əlaqələrin daim inkişaf etdiyini bildirən V.Bilgin əmək və sosial müdafiə sahəsində əlaqələrin inkişaf etdirilməsi üçün səylərin daim artırıldığını vurğulayıb. Hər iki nazirliyin islahatlar prosesində fəal təcrübə mübadilələrinin önəmini qeyd edib.
“Birgə Daimi Komissiyanın iclasında iki nazirlik arasında ötən dövrdə imzalanmış əməkdaşlıq sənədlərinin icrası sahəsində görülmüş işlər nəzərdən keçirilir.
“Əməkdaşlığın müvafiq fəaliyyət sahələri üzrə daha da genişləndirilməsi, sosial sahədə mütərəqqi təcrübələrin tətbiqi, DOST konsepsiyası, elektron xidmətlərin geniş tətbiqi, əlilliyi olan şəxslərə, o cümlədən müharibə əlilərinə reabilitasiya xidmətlərinin göstərilməsi, əmək, məşğulluq sahəsində islahatlar və digər sahələrdə təcrübə və məlumat mübadilələrinin aparılması müzakirə olunur”, – deyə məlumatda daha sonra vurğulanıb.
