Bakıdan gedən 8 uşaq İstanbul Karagümrük Futbol Akademiyasında keçirilən təlim-məşq toplanışına qatılıb
Bayraqdar.info – Ötən yazılarımızdan birində Azərbaycanda futbolun inkişafında qardaş Türkiyənin təcrübəsinin öyrənilməsi istiqamətində atılan addımlardan bəhs etmişdik. Həmin yazıda Bakı Karagümrük Uşaq Futbol Məktəbinin məhz bu məqsədlə yaradıldığını bildirmişdik.
Yazıda qeyd olunurdu ki, Karagümrük Uşaq Futbol məktəbində futbol məşqləri keçən və öz bacarıqları ilə digərlərindən fərqlənən uşaqlar hər il Türkiyədə keçirilən təlim-məşq toplanışına aparılacaq. “Karagümrükspor”un rəhbərliyi tərəfindən təşkil edilən bu toplanışlarda fərqlənənlər isə Türkiyədə qalıb, orada futbolçu kimi yetişmək şansı qazanacaqlar.
“Beləliklə, artıq yeni sezon üzrə təlim-məşq toplanışı başlayıb. “Karagümrükspor”un Türkiyənin müxtəlif şəhərlərində, həmçinin Azərbaycanda olan Uşaq Futbol məktəblərinin ən bacarıqlı üzvləri növbəlilik əsasında bu baxışa çağrılıblar”.
Bunu bayraqdar.info-ya özəl açıqlamasında Bakı Karagümrük Uşaq Futbol Məktəbinin rəhbəri Salman Atluxanov deyib.
Hazırda qardaş ölkədə olan S.Altuxanovun sözlərinə görə baxışa Azərbaycandan 8 uşaq aparılıb: “Öncə onu qeyd edim ki, bizim məktəbin hələ bir yaşı tamam olmayıb. Buna baxmayaraq təlim-məşq toplanışına bizi də dəvət etmələri “Karagümrükspor” rəhbərliyinin Azərbaycana verdiyi dəyər və bizə göstərilən yüksək etimaddır. Biz müəyyən olunan qrafik əsasında İstanbul Karagümrük Futbol Akademiyasında 11-16 may tarixlərində təlim-məşq toplanışında iştirak etdik. Bu müddət ərzində eyni zamanda uşaqlar maraqlı görüşlər də keçirdilər. Bunlardan “Karagümrükspor”un baş məşqçisi, uzun illər futbol üzrə Türkiyə millisinin qapıçısı olmuş Volkan Demirellə görüş isə xüsusuilə yaddaqalan oldu. Uşaqlar bu əfsanəvi futbolçu ilə görüş zamanı çox həyəcanlı idilər”.
Onun sözlərinə görə, Azərbaycandan gedən uşaqlardan ümumilikdə razılıq ifadə olunub: “Xüsusilə türkiyəli mütəxəssislər 2011-ci il təvəllüdlü İlham Mehdizadəni qeyd etdilər. Eyni zamanda digər uşaqlardan da razılıq bildirildi. Təbii ki, son qərar mayın 16-da axşam bəlli olacaq. Yəni Bakıdan gedən 8 uşaqdan akademiyaya kimlərin seçiləcəyi mayın 16-sı axşam bilinəcək”.
