Son yeniləmə: 29 Aprel 2022 09:46
Bayraqdar.info – İqtisadi sahədə jurnalistlərin ixtisaslaşması vacibdir. Bunu Medianın İnkişafı Agentliyinin şöbə müdiri Natiq Məmmədli jurnalistlər üçün keçirilən növbəti təlimin açılışındakı çıxışında dedi.
Qeyd edək ki, aprelin 28-də İqtisadiyyat Nazirliyi və Medianın İnkişafı Agentliyinin birgə təşkilatçılığı ilə iqtisadi sahədə fəaliyyət göstərən media nümayəndələrinin peşəkarlıq səviyyəsinin artırılması məqsədilə “Bazar iqtisadiyyatı və rəqabət mühiti” və “İstehlakçının hüquq və vəzifələri” mövzularında təlim keçirildi.
İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəisinin müşaviri Cəfər Babayev öncə media nümayəndələrini salamladı.
O, təlimin keçirilməsində məqsədin bazar iqtisadiyyatının prinsipləri, tənzimlənməsi metodları, antiinhisar tənzimlənməsi və siyasəti, istehlakçıların hüquq və vəzifələri barədə jurnalistlərin bilik və təcrübələrini artırmaq, habelə onların bu sahədə ixtisaslaşmasına dəstək göstərmək olduğunu bildirdi.
Medianın İnkişafı Agentliyinin şöbə müdiri Natiq Məmmədli belə təlimlərin media nümayəndələrinin biliklərinin artırılmasında və medianın ictimaiyyətə dolğun informasiya çatdırmasında əhəmiyyətini vurğuladı.
Tədbirdə mövzularla bağlı müzakirələr aparıldı, jurnalistlərin sualları cavablandırıldı.
Təlimin sonunda iştirakçılara sertifikatlar təqdim olundu. Sertifikatları media nümayəndələrinə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli və Medianın İnkişafı Agentliyinin İcraçı direktoru Əhməd İsmayılov təqdim etdilər.
Qeyd edək ki, təlim iştirakçıları arasında bayraqdar.info saytının təmsilçisi olaraq Nadir Azəri də vardı.
