Bayraqdar.info – Aprelin 28-də Şamaxı şəhərində “Tullantısız Dünya” proqramı çərçivəsində icra olunacaq layihəyə başlanılıb. Qlobal proqram ölkəmizdə plastik tullantıların ətraf mühitə mənfi təsirinin azaldılması məqsədilə “Coca-Cola” şirkəti tərəfindən icra olunur.
Bu barədə bayraqdar.info-ya aprelin 29-da ASAN xidmətdən məlumat verilib.
Bildirilib ki, “Coca-Cola” Fondunun dəstəyi, “ASAN Könüllüləri” Təşkilatının, Ekologiya və Təbii Sərvətlər Nazirliyinin və yerli icra hakimiyyətlərinin əməkdaşlığı ilə həyata keçirilən layihə növbəti mərhələlərdə Gəncə, Sumqayıt, Mingəçevir, Qəbələ və Quba şəhərlərində təşkil ediləcək.
“Tullantısız Dünya” proqramı çərçivəsində ekoloji rəy sorğuları keçiriləcək: “Layihə üzrə sorğunun aparılmasında məqsəd əhali arasında təkrar emala və tullantıların çeşidlənməsinə münasibəti öyrənmək, eləcə də onların çeşidləmə ilə bağlı təkliflərini toplamaq və bu dinamikanı ilbəil izləməkdir. Toplanmış və emal edilmiş sorğu nəticələri əsasında müvafiq addımların atılması üçün aidiyyəti qurumlarla birlikdə effektiv mexanizmlər işlənib hazırlanacaq”.
Qeyd edilib ki, pilot olaraq plastiklərin toplanmasını ehtiva edən bu layihə gələcəkdə digər qablaşdırma tullantılarının da toplanmasını və təkrar emala göndərilməsini planlaşdırır.
