Bayraqdar.info – Prezident İlham Əliyev aprelin 26-da Ümumdünya Səhiyyə Təşkilatının (ÜST) Avropa üzrə regional direktoru Hans Henri Klugeni qəbul edib.
Prezidentin Mətbuat xidmətinin yaydığı məlumatda bildirilir ki, görüşdə Prezident İ.Əliyev ÜST ilə Azərbaycan arasında səmərəli əməkdaşlığın olduğunu vurğulayıb. Dövlət başçısı ÜST-ün COVID-19-a qarşı mübarizədə Azərbaycana göstərdiyi davamlı dəstəyə görə təşəkkürünü bildirib.
“Prezident bildirib ki, Azərbaycanda COVID-19 ilə bağlı vəziyyət çox müsbətdir, həyata keçirilmiş tədbirlər nəticəsində pandemiyanın çətin dövründə vəziyyət nəzarətdə saxlanılıb. Azərbaycan keçən ilin əvvəlində vaksinasiyaya başlayan ilk ölkələrdən biri olub, indiyədək ölkəmizdə 13 milyondan artıq vaksin istifadə edilib. Azərbaycanda vaksinasiya prosesi anlayışla qarşılanıb.
“Dövlət başçısı bunun vətəndaşlar tərəfindən dövlətin həyata keçirdiyi siyasətə etimadın bir nümunəsi olduğunu deyib. Ölkədə pandemiya ilə bağlı məhdudiyyətlərin tədricən aradan qaldırıldığını deyən Prezident İ.Əliyev bildirib ki, çox az sayda məhdudiyyətlər qalıb, bunu da Azərbaycan ictimaiyyəti anlayışla qarşılayır.
“Azərbaycanın COVID ilə əlaqədar ÜST-ün fəaliyyətini daim dəstəklədiyini bildirən dövlət başçısı vurğulayıb ki, həm Qoşulmama Hərəkatında, həm də BMT Baş Assambleyasında çıxışları zamanı ÜST-ün COVID-19-a qarşı mübarizədə rolunu xüsusilə qeyd edib.
“H.H.Kluge ÜST-ün Baş direktoru Tedros Adhanom Qebreyesusun salamlarını dövlətimizin başçısına çatdırıb.
“Prezident İ.Əliyev salamlara görə minnətdarlığını bildirdi, onun da salamlarını T.A.Qebreyesusa çatdırmağı xahiş edib.
ÜST-ün Avropa üzrə regional direktoru kimi Azərbaycana ilk dəfə gəldiyini vurğulayan H.H.Kluge səfərinin Azərbaycanla BMT arasında tərəfdaşlığın 30 illiyinin qeyd olunduğu bir dövrə təsadüf etməsi baxımından önəmini vurğulayıb. O deyib:”Mən Sizin beynəlxalq diplomatiyada qlobal liderliyinizi yüksək qiymətləndirir və bu münasibətlə Sizi səmimi qəlbdən təbrik edirəm. Sizin davamlı inkişaf istiqamətində çox mühüm fəaliyyətiniz olduqca önəmlidir. Çünki məhz Sizin şəxsi liderliyiniz sayəsində COVID-19 pandemiyasına qarşı beynəlxalq həmrəylik təbliğ edilib və bu məsələ BMT-dən sonra dünyanın ən böyük beynəlxalq təşkilatının – Qoşulmama Hərəkatının gündəliyinin əsas məsələsi olub”.
O, ÜST vasitəsilə Qoşulmama Hərəkatının COVID-dən ən çox əziyyət çəkmiş 10 ölkəsinə Azərbaycanın 10 milyon dollar məbləğində vəsait yönəltdiyinə görə minnətdarlığını bildirib.
Qonaq qeyd edib ki, Azərbaycanın işğaldan azad olunmuş Qarabağ və Şərqi Zəngəzur bölgələrində həyata keçirəcəyi səhiyyə sisteminin qurulması prosesində, xüsusilə rəqəmsal səhiyyə sisteminin yaradılmasında ÜST töhfəsini verməyə və Azərbaycan ilə yaxından əməkdaşlığa hazırdır. O vurğulayıb ki, Azərbaycan ÜST ilə əməkdaşlıq çərçivəsində səhiyyə xidmətlərini təqdim edən regional mərkəzlərdən birinə çevrilə bilər.
