“Hüseyniyyun” qruplaşmasından Azərbaycan xalqına düşmənçilik: Şuşa şəhərini ermənilər kimi “Şuşi” olaraq təqdim edirlər
Bayraqdar.info – İranda məskunlaşan və özlərini “Hüseynçilər” və ya “Azərbaycan Müqavimət Hərəkatı” adlandıran radikal islamçı qüvvələr Azərbaycanın Şuşa şəhərinin adını erməniləşdirərək “Şuşi” kimi təqdim edirlər.
“Azad İran” Telegram kanalı xəbər verir ki, qruplaşmanın bu yaxınlarda yaratdığı “Azərbaycan Araşdırmalar Mərkəzi” son günlər Şuşada keçirilən Zəfər Qurultayı əleyhinə silsilə yazılar dərc edib.
Həmin yazılarda Şuşa şəhəri davamlı olaraq “Şuşi” kimi təqdim edilir. Maraqlıdır ki, “Hüseyniyyun” qruplaşmasının üzvləri özlərini dildə guya dindar, Azərbaycan dövlətçiliyinin və xalqının təəssübkeşi və vətənpərvər insanlar kimi qələmə verərək səmimi dindarları aldatmağa və öz məqsədləri üçün istifadə etməyə çalışırlar.
Qeyd etmək lazımdır ki, İranda Şuşa şəhərinin adını ermənilər kimi təqdim edən əsas dairələr Ermənistanın sərhədini və təhlükəsizliyini özləri üçün “qırmızı xətt” elan edən, əvəzində isə Azərbaycana qarşı barışmaz düşmən mövqeyi sərgiləyən SEPAH, ETTELAAT və onların Salar Seyfəddini kimi erməni təəssübkeşi olan əlaltılarıdır. Bu fakt isə göstərir ki, “Hüseynçilər” dildə İmam Hüseyn deyib “şaxsey” etsələr də əməldə haqq tərəfdarı deyil, ermənilər və onları dəstəkləyənlərin tərəfində olub “ağalarının” sifarişlərini yerinə yetirirlər.
Nədənsə “sionist” deyə-deyə bar-bar bağıran, qarabasma səbəbindən hər yerdə “sionist” və “ingilis” görən bu dırnaqarası “möminlər” “qırmızı xətt” elan etdikləri Ermənistanın Qərb tərəfindən hakimiyyətə gətirilmiş baş nazirini bağırlarına basır, onun Qərblə münasibətləri barədə bir dəfə də olsun çıxış etmirlər. Çünki Ermənistan “ağaları”nın “qırmızı xətt”idir və ona toxunmaq loxmadan məhrum olmaq deməkdir…
