Bayraqdar.info – Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin və Ağstafa Rayon İcra Hakimiyyətinin dəstəyi ilə “Keşikçidağ” Dövlət Tarix-Mədəniyyət Qoruğu tərəfindən veloyürüş keçirilib.
Xidmətdən bayraqdar.info-ya verilən xəbərdə bildirilir ki, veloyürüş rayonun Soyuqbulaq qəsəbəsindən başlayaraq qoruğa məxsus informasiya mərkəzinə qədər Ağstafa rayon könüllülərinin iştirakı ilə keçirilib. Yürüşdə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin, Ağstafa Rayon İcra Hakimiyyətinin məsul şəxsləri, Ağstafa rayonunun idarə və təşkilatlarının rəhbərləri, alimlər, ziyalılar, 44 günlük Vətən müharibəsində qəhrəmancasına döyüşərək yaralanan qazilər iştirak ediblər.
“Yürüşə qara zurnada ifa olunan “Cəngi” sədaları altında start verilib. Yürüşdən sonra iştirakçılar Ceyrançuxur, Sarıyoxuş-1 və 2 saylı kurqanları, Qaltan və Karvan dərəsi, Hasarlı yaşayış düşərgəsi haqqında məlumatlandırılıb. Bələdçilər bildiriblər ki, Keşikçidağ mağaralar kompleksinin ərazisində ilkin yaşayışın izləri daş dövrünə, buradakı kurqanların yaşı isə son tunc – erkən dəmir dövrünə təsadüf edir.
“Qoruğa məxsus informasiya mərkəzinin önündə tədbirin rəsmi hissəsi başlanıb. Qoruğun direktoru Musa Mursaquliyev qonaqları salamlayıb.
“Xidmətin şöbə müdiri Ruslan Ənvərli isə bildirib ki, yürüş 16 kilometr məsafəni əhatə edib. “Veloyürüşə həm gənclər, həm də yaşlı insanlar qatılıb. Məqsəd qoruq ərazisində yerləşən, tarixi daş dövründən başlayaraq son orta əsrlərə qədər olan tarix-memarlıq abidələrinin daha geniş tanıdılmasıdır. İstəyirik ki, hər kəs abidələri sevsin, qayğı göstərsin və onları gələcək nəsillərə çatdıraq”, – deyə Ruslan Ənvərli əlavə edib.
“Daha sonra Ağstafa rayon Gənclər və İdman İdarəsinin rəisi Əziz Məsmalıyev, 15 ildən çox qoruq ərazisində elmi tədqiqatlar aparmış, hazırda fəaliyyətini bölgəmizdə davam etdirən, BDU-nun dosenti, sənətşünaslıq üzrə elmlər doktoru İmaş Hacıyev, BDU-nun dosenti, filologiya üzrə elmlər doktoru Valeh Nəsibov, əməkdar mədəniyyət işçisi Hüseyn Hüseynov və Vətən müharibəsində qəhrəmancasına iştirak etmiş qazilərimiz çıxış edərək, Keşikçidağ mağaralar kompleksi və yürüş barədə təəssüratlarını bölüşüblər”, – deyə xəbərdə bildirilir.
