Son yeniləmə: 21 Aprel 2022 13:47
Bayraqdar.info – Aprelin 20-də Azərbaycan Turizm Bürosunun təşkilatçılığı və Tiflis şəhərində yerləşən “Azerbaijan.Travel” qonaq mərkəzinin dəstəyi ilə iki ölkə arasında birgə turların inkişafından bəhs edən vebinar keçirilib.
Bu barədə bayraqdar.info-ya Dövlət Turizm Aəentliyindən məlumat verilib.
Bildirilib ki, görüşdə Azərbaycan Turizm Bürosu və Gürcüstan Milli Turizm Administrasiyasının nümayəndələri iştirak edib: “Görüşdə müştərək turizm məhsulları barədə ideyalar və birgə turları uzunmüddətli səyahətçilər üçün cəlbedici etmək planları müzakirə olunub.Müzakirələr mədəni və tarixi irs, sağlamlıq, qastronomiya, macəra turizmi, quş müşahidəçiliyi, trans-Qafqaz haykinq yolları, “İter Vitis Qafqaz” şərab marşrutu, “Əli və Nino” turizm marşrutu və digər məhsullar üzrə mövzuları əhatə edib”.
Qeyd edilib ki, “Azərbaycan-Gürcüstan birgə səyahət layihəsi” çərçivəsində keçirilən onlayn görüşdə Gürcüstanın turizm şirkətləri və turizm üzrə ixtisaslaşmış ictimai təşkilatları da iştirak edib: “Qeyd edək ki, layihəyə əsasən planlaşdırılan birgə turların əsas hədəfi Avropanın bəzi ölkələri ilə yanaşı, Çin, Yaponiya, İndoneziya, Malayziya, ABŞ və Kanadadan olan, daha çox uzunmüddətli səyahətə üstünlük verən turistlər olacaq”.
