Son yeniləmə: 18 Aprel 2022 10:33
Bayraqdar.info – Sumqayıt Şəhər Gənclər və İdman Baş İdarəsinin və Azərbaycan Cüdo Federasiyasının təşkilatçılığı ilə “Şuşa İli”nə həsr olunan cüdo üzrə Sumqayıt şəhər birinciliyi başa çatıb.
15 yaşadək (U-15) yeniyetmələr arasında gərgin mübarizə şəraitində keçən yarışın ikinci günündə oğlanlar arasında 7 çəki dərəcəsində çempionlar müəyyənləşib. Belə ki, Abdulla Kərimov (46 kq), Kamal İbadov (50 kq), Ramazan Rzayev (55 kq), Əmi Şirinov (60 kq), İbrahim Balayev (66 kq), Bəhruz Məmmədov (73 kq), Polad Poladov (+73 kq) bütün rəqiblərini məğlub edərək birinci yerə sahib olublar.
Federasiyadan bayraqdar.info-ya verilən xəbərdə bildirilir ki, sonda mükafata layiq yer tutan cüdoçular təltif olunublar.
“Qeyd edək ki, Sumqayıt Olimpiya İdman Kompleksində 2008-2010-cu il təvəllüdlü idmançılar arasında təşkil edilən yarışda, ümumilikdə 300-dən çox idmançı 20 çəki dərəcəsi üzrə mübarizə aparıb.
“İki gün davam edən yarışın təşkilində əsas məqsəd ölkəmizin bütün regionlarında cüdonu daha da populyarlaşdırmaq və kütləviləşdirməklə yeni istedadları üzə çıxarmaq, həmçinin onların vətənpərvərlik hisslərini gücləndirmək, yeniyetmələr və gənclər arasında idman vasitəsilə sağlam həyat tərzini təbliğ etməkdir”, – deyə xəbərdə qeyd edilir.
