Yücel Karauz: Bu liderin rəhbərliyi ilə həyata keçirilən siyasət sayəsində Azərbaycan ordu quruculuğu məsələsində də ön sırada gedir
Bayraqdar.info – “Bir dövlət üçün ən önəmli məsələ milli güc ünsürlərinin qüvvətli, dinamik və ölkənin coğrafi, geostrateji vəziyyətinə uyğun olaraq gücləndirilməsi, çevik bir şəkildə günün şərtlərinə uyğun olaraq addım atması, hər bir prosesə hazırlıqlı olmasıdır. Azərbaycan dövləti Vətən müharibəsi zamanı böyük zəfər əldə etdi. 28 il işğal altında saxlanan torpaqlarını cəmi 44 gün ərzində işğaldan azad etdi. Bu zəfər həm də Azərbaycanın ordu quruculuğuna göstərdiyi diqqət və qayğının nəticəsi idi. Bu müharibədə dünyadakı müasir silah və sursatlardan, texnikadan uğurla istifadə edən Azərbaycan Ordusu müasir hərb tarixinə öz adını yazdı”.
Bunu Türkiyənin ölkəmizdəki sabiq hərbi attaşesi, ehtiyatda olan general Yücel Karauz Azərbaycan Prezidenti İlham Əliyevin aprelin 12-də bu ilin birinci rübünün yekunlarına həsr olunan müşavirədəki çıxışına münasibət bildirərkən deyib.
Xatırladaq ki, dövlət başçısı müharibədən dərhal sonra bütün başqa bərpa işləri ilə bərabər, həmişə olduğu kimi hərbi sahəyə də fikir verildiyini bildirib. Müharibədən sonra Türkiyə və İsrail şirkətləri ilə yeni, böyük kontraktların imzalandığı vurğulanıb.
Prezident yeni silahların, texnikaların alındığını, bununla bərabər olaraq müharibədən sonra Müdafiə Nazirliyində struktur islahatları aparıldığını, struktur dəyişikliyi edildiyini bildirib. Dövlət başçısı deyib ki, bu, ordumuzu daha da gücləndirəcək, daha da müasirləşdirəcək. Həmçinin müharibədən sonra yeni qoşun növünün – Komando növünün yaradıldığını bildirən dövlət başçısı “Hadrutda birinci Komando hərbi bazasının açılışında mən şəxsən iştirak etmişəm. Bu, çox güclü bir qoşun növüdür. Əminəm ki, hazırda artıq bu qoşun növü istənilən vəzifəni icra edə bilər. Biz isə sadəcə olaraq komandoların sayını ildən-ilə artıracağıq. Hesab edirəm ki, onların sayı ilə bağlı məlumat vermək yersizdir, ancaq hər kəs bilməlidir ki, minlərlə tam hazırlıqlı döyüşçü artıq hazırlanıb və hazırlanacaq”, deyib.
Ölkəni, torpağı və bayrağı qorumağa hər an hazır olan güclü bir ordu yaradılıb
Öz növbəsində çıxışdakı bu məqama toxunan Y.Karauz bayraqdar.info-ya açıqlamasında bildirib ki, müdafiə sənayesi çox dinamik bir sahədir: “Bu sahədə hər gün dəyişən şərtlərə görə tədbir görmək və addımlar atmaq vacibdir. Bu addımlar isə ordunun ən müasir silah və sursatla, hərbi texnika ilə təminatından keçir. Hərb sahəsində təməl bir prinsip var. Sistemlərin dinamik, davamlı, dəyişkən və inkişaf edən şərtlərə uyğun hala gətirilməsi əsasdır. Cənab Prezident, Ali Baş Komandan İlham Əliyev Zəfər paradından sonra ordunun təhcizatını, təlim mərkəzlərinin yenidən dizayn edilməsi tapşırığını verib. Bu istiqamətdə quru qoşunlarının, həmçinin yeni qoşun növü olan Komando növünün yaradılmasını da xüsusi qeyd etməliyik. Ümumiyyətlə Prezident İlham Əliyev tərəfindən göstərilən diqqət və qayğı nəticəsində Azərbaycanda ölkəni, torpağı və bayrağı qorumağa hər an hazır olan güclü bir ordu yaradılıb”.
Y.Karauzun sözlərinə görə, bu cür dinamik bir ordu quruculuğu ancaq güclü bir siyasi liderliklə, güclü dövlət idarəçiliyi ilə mümkündür: “Bu gün Azərbaycanın milli maraqlara əsaslanan siyasət həyata keçirən güclü bir lideri var. Məhz bu liderin rəhbərliyi ilə həyata keçirilən düşünülmüş, praqmatik və çevik siyasət sayəsində Azərbaycan digər sahələrdə olduğu kimi ordu quruculuğu məsələsində də ön sırada gedir. Bir sözlə, hazırda öz bacarığı və imkanları ilə fərqlənən Azərbaycan Ordusu Qafqazın ən güclü ordusudur”.
Ermənistana əvəzsiz silah sistemləri verənlər yaxşı-yaxşı düşünməlidir
Açıqlamasında dövlət başçısının “əgər yenidən Ermənistanın silahlanmasına pul ayrılacaqsa, biz bunu qeyri-dost addım kimi qiymətləndirəcəyik və öz addımlarımızı buna uyğun şəkildə atacağıq” fikrinə də münasibət bildirən müsahibimiz deyib: “Ermənistan üçün təslimçilik aktı olan 10 noyabr Bəyanatından sonra Azərbaycan tərəfi dəfələrlə sülh danışıqlarına hazır olduğunu bəyan edib və bu istiqamətdə addımlar atıb. Brüssel görüşündən sonra Azərbaycan və Ermənistan ilk dəfə üçüncü bir tərəfin iştirakı olmadan birbaşa telefonla danışıblar. Bu, olduqca sevindirici bir mərhələdir. Deməli ki, əbədi sülhə gedən yolda böyük bir məsafə qət edilib. Bunun davamlı olması üçün xarici güclərin də normal addım atması lazımdır. O mənada ki, bu vaxta qədər Ermənistanın və Azərbaycanın silahlanmasında Ermənistanın xeyrinə olan ədalətsizliyə yol verilib. Cənab Prezident İlham Əliyevin də dediyi kimi, Ermənsitana verilən və sonra geri qaytarılıb-qaytarılmadığı bəlli olmayan kreditlər bu ölkənin silahlanmasına ayrılır. Hansı ki, bu kreditlər verilməsəydi İkinci Qarabağ müharibəsinə ehtiyac qalmazdı. Yəni Ermənistanın bu silahlanması işğalçılıq siyasətinin davamına xidmət edib. Bunun müqabilində isə Azərbaycan özünü müdafiə üçün aldığı silahaları da öz pulu ilə əldə edib. Dolayısı ilə Ermənistanın silahlanmasına dəstək, kömək olanlarn Azərbaycana dost olmadığı da bəllidir”.
Qeyd olunub ki, cənab Prezidentin bu məqama diqqət çəkməsi təsadüfi deyil: “Yəni bundan sonra Ermənistana əvəzsiz, balansı pozan və ya müdafiəyə deyil, işğalçı hücuma yardım edə biləcək silah sistemləri verənlər yaxşı-yaxşı düşünməlidir. Bu addımın qarşısında Azərbaycanın və Türkiyənin olduğunu da bilməlidirlər”.
