Bayraqdar.info – Kuzey Kıbrıs Türk Cümhuriyyətinin baş naziri Faiz Sucuoğlu aprelin 13-də Ankaraya səfər edəcək. Bu barədə mediaya Baş nazirlik müşaviri Hüseyn Amcaoğlu məlumat verib.
Onun sözlərinə görə, Baş nazir Faiz Sucuoğlu və maliyyə naziri Sunat Atun aprelin 13-də günorta saatlarında KKTC-dən ayrılacaqlar. Onlarla bərabər geniş bir nümayəndə heyəti də Türkiyəyə gedəcək.
Səfərdə məqsəd Türkiyə ilə KKTC arasında İqtisadi və maliyyə əməkdaşlıq protokolunun imzalanmasıdır. Yəni səfər çərçivəsində, aprelin 14-də sözügedən sənədin imzalanması gözlənilir.
Həmin sənəd üzərində işlərin 2021-ci ildən bəri davam etdiyini deyən H.Amcaoğlunun sözlərinə görə, seçkilərdən sonra yeni hökumətin formalaşması ilə bu işlərdə də yenilənmə olub.
