Son yeniləmə: 12 Aprel 2022 12:35
Bayraqdar.info – Beynəlxalq Türk Mədəniyyəti və İrsi Fondunda təşkilatın prezidenti Günay Əfəndiyeva Qırğızıstanın ölkəmizdəki səfiri Kayrat Osmonaliyev və tanınmış şair, Əməkdar jurnalist Adil Cəmil ilə görüşüb.
Bu barədə bayraqdar.info-ya aprelin 12-də Fonddan məlumat verilib.
Bildirilib ki, görüşdə G.Əfəndiyeva rəhbəri olduğu Fondun qurucu üzv ölkəsi olan Qırğızıstanla qarşılıqlı əməkdaşlığın, türk dünyasının qədim maddi və mənəvi dəyərlərinin beynəlxalq aləmdə tanıdılması ilə bağlı birgə işlərin görülməsinin əhəmiyyətindən bəhs edib: “Fondun prezidenti, eyni zamanda, TÜRKSOY-un yeni Baş katibinin Qırğızıstanın nümayəndəsi Sultanbai Raevin təyin olunması münasibətilə səfiri təbrik edib. G.Əfəndiyeva Bursaya rəsmi səfəri çərçivəsində Qırğızıstanın mədəniyyət, informasiya, idman və gənclər siyasəti naziri Azamat Jamanqulovla görüşünü xatırladaraq, Qırğızıstanın mədəni dəyərlərinin tanıdılması istiqamətində əlaqələrin genişlənməsinin vacibliyinə toxunub”.
Səfiri K.Osmonaliyev Beynəlxalq Türk Mədəniyyəti və İrsi Fondu tərəfindən türk dünyasının çoxəsrlik tarixinin, zəngin irsinin qorunması, öyrənilməsi, eləcə də türk xalqları arasında birliyin möhkəmləndirilməsi istiqamətində təşkil olunan təqdirəlayiq tədbirlərin şahidi olduğunu vurğulayıb. Diplomat göstərilən səylərə görə Fondun prezidentinə təşəkkür edib.
Səfir Fond ilə Qırğızıstan arasında tərəfdaşlıq münasibətlərinin yüksələn xətlə inkişafından məmnunluq duyduğunu deyib. Qırğızıstanın böyük şəxsiyyətlərinin yubileylərinin qeyd olunması, türk dünyasının qədim eposlarının, o cümlədən “Manas” kimi qəhrəmanlıq dastanlarının tədqiqi yönündə birgə aparılacaq işlərin önəmindən söz açıb.
Görüş tərəflər arasında 2022-ci il üçün birgə mədəni tədbirlər planının müzakirəsi ilə davam edib.
