Son yeniləmə: 8 Aprel 2022 11:10
Bayraqdar.info – Aprelin 8-də “Yevlax KOB evi”nin fəaliyyətə başlamasından bir il ötür. Ötən bir ildə “Yevlax KOB evi” tərəfindən sahibkarlara 34 min 996 xidmət göstərilib. Bunlardan 32 min 905-i “G2B”, 2 min 901-i isə “B2B” xidmətlərdir. Göstərilən xidmətlərdən sahibkarların məmnunluq səviyyəsi 99 faizdir.
Bu barədə bayraqdar.info-ya KOBİA-dan məlumat verilib.
Bildirilib ki, hazırda “Yevlax KOB evi”ndə sahibkarlara 9 dövlət qurumu tərəfindən 150-dək “G2B”, 5 özəl şirkət tərəfindən 70-dək zəruri “B2B” xidmətlər göstərilir. Sahibkarlar ötən bir ildə daha çox vergi və kommunal xidmətlərlə bağlı “Yevlax KOB evi”nə müraciət ediblər. “Yevlax KOB evi”ndə sahibkarlara vergi və kommunal xidmətlərlə yanaşı, biznes fəaliyyəti ilə bağlı lazım olan biznesin qeydiyyatı, sahibkarlıq fəaliyyəti üçün lisenziyalar və mənşə sertifikatı, əmlakın dövlət reyestrindən çıxarışı, aqrar sahə üzrə subsidiyalar, açıq məkanda reklamın yerləşdirilməsinə icazə, qida təhlükəsizliyi sertifikatı, bank və s. xidmətlər göstərilir. “Yevlax KOB evi”nin xidmətlərindən daha çox Yevlax, Bərdə, Mingəçevir və Ağdaşdan olan sahibkarlar istifadə ediblər.
O da qeyd edilib ki, KOB evləri Kiçik və Orta Biznesin İnkişafı Agentliyinin (KOBİA) struktur bölməsidir. Hazırda Xaçmaz və Yevlax şəhərlərində olmaqla iki KOB evi fəaliyyət göstərir. KOB evlərinin əsas üstünlüyü sahibkarların biznes xidmətlərini vahid məkanda alması, bununla da vaxtına və əməliyyat xərclərinə qənaət etməsi, sahibkarlara göstərilən xidmət səviyyəsinin ölçüləbilən olmasıdır.
