Son yeniləmə: 5 Aprel 2022 12:49
Bayraqdar.info – “Caspian Textile” müəssisəsi istehsal gücünü və məhsul çeşidini artırır. Bu müəssisə Kiçik və Orta Biznesin İnkişafı Agentliyi (KOBİA) və “Birgə İnvest”in təmin etdiyi dövlət dəstəyi ilə yaradılıb.
Bu barədə bayraqdar.info-ya KOBİA-dan məlumat verilib.
Bildirilib ki, müəssisənin yaradılmasına KOBİA və “Birgə İnvest” vasitəsilə maliyyə mənbələrinə çıxış, biznesin planlaşdırılması və təşkili, daxili bazar araşdırmalarının aparılması, biznes planın tərtib edilməsi, işçi heyəti üçün təlimlərin təşkili istiqamətlərində dəstək göstərilib.
Vurğulanıb ki, aprelin 5-də KOBİA-nın nümayəndələri müəssisədə istehsal prosesi ilə tanış olub, gələcək planları və lazımi dəstək barədə fikir mübadiləsi aparıblar: “Məlumat verilib ki, hazırda müəssisə tərəfindən müxtəlif uniformalar, məktəbli, işçi, hərbi və s. geyimlər istehsal edilir, işçi dəbilqələri, əlcəklər, ayaqqabılar və respiratorlar satışa çıxarılır. Müasir avadanlıqlarla təchiz edilmiş müəssisədə tikiş, boya, naxış, model dizayn və konstruktor büroları var. Son bir ildə müəssisədə aylıq istehsal gücü 15 min ədəd geyimə çatdırılıb. Yeni tekstil məhsullarının istehsalı və müəssisənin istehsal gücünün aylıq 30 min ədəd geyimə çatdırılması istiqamətində müvafiq işlər görülür. Müəssisədə 60-a yaxın işçi çalışır. Həssas əhali qrupuna aid olan insanların uyğun vəzifələrdə işlə təmin olunmasına diqqət yetirilir”.
