Yücel Karauz: Aprel döyüşlərində Azərbaycan Ordusunun azad etdiyi strateji ərazilər 2020-ci il Vətən müharibəsində öz sözünü dedi
Bayraqdar.info – “Aprel döyüşlərində əldə edilən qələbə Türkiyənin Sakarya zəfərinə bərabər bir qələbədir. 23 avqust-13 sentyabr 1921-ci il tarixləri arasında davam edən Sakarya Meydan Müharibəsi nəticəsində qazanılan qələbə Türkiyə tarixində bir dönüş nöqtəsidir. Anadolu türk tarixinin ən əhəmiyyətli döyüşlərindən biri olan Sakarya döyüşünün qazanılması türk xalqının ümumi döyüşün qazanılacağına olan inamını bərpa etmişdi. Məhz Sakarya zəfəri ilə Türkiyənin Avropada 1683-cü ildən etibarən geri çəkilməsinə, ərazi itirməsinə son qoyuldu və Türkiyə yenidən ayaqda duraraq İstiqlal Savaşını da qələbə ilə başa vurdu. Məhz bu tarixi qələbənin ardınca qazanılan silsilə qələbələr nəticəsində işğalçılar dənizə töküldü və Türkiyə müstəqil bir dövlət olaraq ayağa qalxdı”.
Bunu Azərbaycan ordusunun qələbəsi ilə bitən 2016-cı il Aprel döyüşlərinin 6-cı ildönümü ilə bağlı bayraqdar.info-ya açıqlama verən Türkiyənin ölkəmizdəki sabiq hərbi attaşesi, ehtiyatda olan general Yücel Karauz deyib.
Onun sözlərinə görə, Aprel döyüşləri də Azərbaycanın 200 illik geri çəkilməsinə, torpaq itirməsinə son qoydu: “Özü də təkcə buna nöqtə qoyulmadı. Aprel döyüşləri Azərbaycan xalqının milli bir ruhla, yenidən ayağa qalxaraq irəli atılmaq ruhu ilə düşmən üzərinə hərəkətə keçməsi kimi tarixə düşdü. Dolayısı ilə Aprel döyüşləri 2020-ci il Vətən müharibəsinin də müjdəçisi oldu” .
Qeyd edilib ki, 2016-cı ilin Aprel döyüşlərində Azərbaycan Silahlı Qüvvələri dövləti, xalqı, torpağı və bayrağı üçün şəhid olmağa, torpaqlarını işğaldan azad etməyə hazır olduqlarını ortaya qoydu: “Azərbaycan əsgərləri bu yolda bütün çətinliklərə sinə gərməyə hazır olduqlarını dünyaya nümayiş etdirdilər. Aprel döyüşləri həmçinin güclü lider, güclü dövlət, güclü xalq, güclü cilahlı qüvvələrin nə qədər önəmli olduğunu göstərdi. Bu döyüşlər Azərbaycanın regional güc, Azərbaycan Ordusunun isə Qafqazın ən güclü ordusu olduğunu ortaya qoydu”.
Türkiyəli generalın sözlərinə görə, bu gün ətrafımızda yaşanan Qazaxıstan və Ukraynada hadisələrini də nəzərə alsaq, Azərbaycan dövlətinin ordu quruculuğuna göstərdiyi diqqət və qayğının nə qədər önəmli olduğunu deyə bilərik: “Digər tərəfdən, 2016-ci ilin Aprel döyüşləri ilə başlanan və 2020-ci ilin Vətən müharibəsi ilə son nöqtəsi qoyulan Azərbaycanın tarixi zəfəri dövlətin ordu quruculuğuna göstərdiyi diqqət və qayğının hədər getmədiyini təsdiqlədi. 1-5 aprel 2016-cı il tarixində Azərbaycan Ordusu müasir silah sistemləri, yeni taktiki və texniki döyüş forması ilə bərabər bir neçə cəbhədə döyüşə bilmək qabiliyyətini də nümayiş etdirdi. Qeyd edim ki, müharibədə eyni vaxtda bir neçə cəbhədə əməliyyat aparmaq heç də asan bir şey deyil. Amma Aprel döyüşlərində Azərbaycan Ordusu böyük məharətlə bunu etdi və uğur qazandı”.
“Mən “2016-ci ilin Aprel döyüşlərindən başlanan və 2020-ci ilin Vətən müharibəsi ilə son nöqtəsi qoyulan Azərbaycanın tarixi zəfəri” ifadəsini heç də təsadüfən işlətmədim. Məsələ burasındadır ki, məhz 2016-cı ilin Aprel döyüşlərində Azərbaycan Ordusunun azad etdiyi strateji ərazilər 2020-ci il Vətən müharibəsində tarixi Zəfərin əldə edilməsində öz sözünü dedi. Bir sözlə, Aprel döyüşlərində əldə edilən hərbi uğurla yanaşı nümayiş etdirilən siyasi qətiyyət, bütün dünyaya ünvanlanan “mən burdayam. Sülh tərəfdarıyam. Amma lazım gələrsə Dəmir yumruğumu da işə sala, torpağımda gözü olanın gözünü ova bilərəm” mesajının da verilməsi idi. Ona görə də gələcəkdə Azərbaycan ordu quruculuğu və tarixi yazılarkən 2016-cı ilin Aprel döyüşlərinə xüsusi yer ayrılacaq. Şuşanı tapança ilə, bıçaqla, əlbəyaxa döyüşlə işğaldan azad edən Azərbaycan Ordusunun qəhrəmanlığı da artıq tarixə qızıl hərflərlə yazılıb. Mən həm Aprel döyüşlərində, həm də ümumilikdə Azərbaycan dövlətçiliyi, torpaqların işğaldan azad edilməsində şəhid olanlara Allahdan rəhmət diləyir, qalanlara isə can sağlığı arzu edirəm. Aprel döyüşləri ilə qalxan Dəmir yumruğun Azərbaycan durduqca Azərbaycan dövlətinin gücü, qüvvəti, inancı və imanının bir simvolu olaraq daim ucalarda qalmasını arzu edirəm”, – deyə Y.Karauz sonda bildirib.
