Son yeniləmə: 1 Aprel 2022 11:27
Bayraqdar.info – “Azərbaycan Quş Əti, Yumurta İstehsalçıları və İxracatçıları Assosiasiyası quş əti istehsalçılarının pərakəndə ticarət şəbəkələri ilə əməkdaşlıqda üzləşdikləri problemləri hökumət rəsmiləri ilə müzakirə etmək niyyətindədir”.
Bu barədə bayraqdar.info-ya aprelin 1-də qurumun Analitika və İctimaiyyətlə əlaqələr departamentindən məlumat verilib.
Bildirilib ki, Assosiasiya rəhbərliyi iqtisadiyyat naziri Mikayıl Cabbarov, kənd təsərrüfat naziri İnam Kərimov, Azərbaycan Qida Təhlükəsizliyi Agentliyinin sədri Qoşqar Təhməzli, İqtisadiyyat Nazirliyi yanında Antiinhisar və İstehlak Bazarı Dövlət Xidmətinin rəisi Məmməd Abbasbəyliyə rəsmi müraciət edib. Müraciətdə quş əti istehsalçıları ilə görüşərək mövcud problemlərin həlli imkanlarını müzakirə edilməsi xahiş edilib.
Məlumatda daha sonra deyilir ki, Assosiasiyanın sədri Mürvət Həsənli hər bir ölkənin ərzaq təhlükəsizliyinin təmin olunmasının əsas yolu yerli istehsalın yaradılması, inkişaf etdirilməsi olduğunu deyib. Onun sözlərinə görə təqdirəlayiq haldır ki, son illərdə Azərbaycanda bu baxımdan dövlət tərəfindən yerli istehsalçılara yönəlik bir sıra mühüm dəstək tədbirləri həyata keçirilir.
M.Həsənli vurğulayıb ki, Azərbaycanda əhalinin qida rasionunda mühüm yer tutan ərzaq məhsullarından biri də quş ətidir: “Fəxrlə deyə bilərik ki, yerli istehsalçılarımızın ölkəmizin bu məhsula tələbatını tamamilə ödəmək potensialı var. Lakin istehsal müəssisələrinin bu potensialı tam isitfadə etməsi bir sıra səbəblərdən hələ ki, mümkün olmur. Bu səbəblər arasında iri pərakəndə ticarət şəbəkələrinin yaratdığı maneələr mühüm yer tutur. Belə ki, bu şəbəkələr istehsalçılardan aldıqları məhsulların dəyərini vaxtında ödəmir, aylarla yubadırlar. Bu isə istehsal zəncirində ciddi ləngimələrə səbəb olur. Eyni zamanda pərakəndə ticarət şəbəkələrinin bir çoxunda quş əti məhsulları tələb olunan şəraitdə saxlanmır”.
Bildirilib ki, bu da istehsalçılar üçün məhsul itkisinə, istehlakçılar üçünsə qida təhlükəsinə səbəb olur: “Bundan əlavə, qeyri-adekvat saxlama şəraitinə görə keyfiyyəti aşağı düşən quş əti məhsullarına alıcıların inamı azalır. Yerli quş əti istehsalçılarının üzləşdiyi bu problemləri ətraflı müzakirə etmək, onların aradan qaldırılmasına nail olmaq üçün biz əlaqədar dövlət qurumlarının rəhbərləri ilə görüşmək qərarına gəldik”.
