Son yeniləmə: 30 Mart 2022 13:59
Bayraqdar. info – Energetika naziri Pərviz Şahbazov Beynəlxalq Bərpa Olunan Enerji Agentliyinin (IRENA) baş direktoru Francesco La Camera ilə görüşüb. Görüş Almaniyada keçirilən “Berlin Enerji Keçidi Dialoqu” tədbiri çərçivəsində baş tutub.
Bu barədə bayraqdar.info-ya Energetika Nazirliyindən məlumat verilib.
Bildirilib ki, görüşdə energetika naziri bərpa olunan enerji sahəsində ölkəmizdə həyata keçirilən və planlaşdırılan layihələr barədə ətraflı məlumat verib. Təşkilat ilə əməkdaşlığın dərinləşdirilməsi üçün potensial istiqamətlər diqqətə çatdırılıb.
Məlumata əsasən, bu xüsusda Qarabağ və Şərqi Zəngəzur iqtisadi rayonlarında bərpa olunan enerjidən istifadə ilə bağlı müxtəlif istiqamətlərə investorların təşviqi məsələsi müzakirə edilib: “Bildirilib ki, “Yaşıl Enerji Zonası” konsepsiyasına uyğun olaraq işğaldan azad edilmiş ərazilərdə yaşayış evlərinin enerji tələbatı məhz bərpa olunan enerji mənbələri hesabına təmin ediləcək. İlk kənddə bütün evlərin üzərində günəş kollektorları, ictimai binaların üzərində 300 kVt-dan çox gücə malik günəş panelləri və ümumi gücü 636 kVt olan 3 ədəd Arximed qurğusunun quraşdırıldığı qeyd edilib. Gələcəkdə bu təcrübənin davam etdirilməsi, tikiləcək fərdi mənzillərdə günəş panellərinin və kollektorlarının quraşdırılması, habelə ərazidəki bərpa olunan enerji mənbələri potensialından istifadə etməklə layihələrin icrası nəzərdə tutulur ki, bu istiqamətlərdə əməkdaşlıq imkanlarının dəyərləndirilməsinin vacibliyi vurğulanıb”.
IRENA-nın baş direktoru Francesco La Camera isə Azərbaycan ilə təşkilatın əməkdaşlığından məmnunluğunu ifadə edib. O, hazırkı imkanların dəyərləndirilməsinə təmsil etdiyi qurumun dəstək verəcəyini bildirib.
Görüşdə ikitərəfli əməkdaşlığa dair digər məsələlər ətrafında fikir mübadiləsi aparılıb.
