Bayraqdar.info – “Vətəndaş Qəbulu Mərkəzinin istifadəyə verilməsi vətəndaşlarla dövlət qurumları arasında münasibətlərin həm sistemləşdirilməsi, həm də müraciətlərin çevik şəkildə həyata keçirilməsi baxımından çox vacibdir”.
Bu sözləri bayraqdar.info-ya martın 28-də Prezident İlham Əliyev açılışını həyata keçirdiyi Vətəndaş Qəbulu Mərkəzinin Azərbaycan vətəndaşlarının həyatında oynayacağı rol barədə danışarkən millət vəkili Vüqar Bayramov deyib.
“Nəzərə alaq ki, son dövrlərdə vətəndaşların müraciətləri ilə bağlı qərarların qəbul edilməsi və bütövlükdə ictimaiyyətin dinlənilməsi və qəbulların keçirilməsi ilə bağlı xüsusi göstərişlər var. Məqsəd də ondan ibarətdir ki, hökumət üzvləri vətəndaşları yaşadıqları yerlərdə qəbul etsin. Mart ayından etibarən vətəndaşların səyyar qəbulu da bərpa edilib. Ona görə də yeni Qəbul Mərkəzi vətəndaşların, xüsusilə də onların problemləri və maraqlandıran məsələlərlə bağlı müraciət etmək istəyən vətəndaşlar üçün yeni bir imkandır. Bu, təbii ki, onlara müraciət etmək imkanı verməklə yanaşı, problemlərinin daha qısa zamanda araşdırılıb həll edilməsinə yardım etmiş olacaq”, – deyə V.Bayramov qeyd edib.
Onu da qeyd edək ki, Prezident Administrasiyasının rəhbəri Samir Nuriyev açılışda ölkə başçısına məlumat verərək deyib ki, beşmərtəbəli binada yerləşən Mərkəzdə vətəndaşların rahat müraciət etmələri və onların müraciətlərinə baxılması üçün zəruri şərait yaradılıb.
“Mərkəzdə gözləmə zalları, qəbulların aparılacağı xidməti otaqlar, kollektiv qəbullar üçün nəzərdə tutulan müxtəlif ölçülü zallar, həkim, psixoloq, hüquq məsləhətçisi, ana və uşaq otaqları vardır.
“Vətəndaş Qəbulu Mərkəzində tətbiq olunan yeniliklərdən biri də Çağrı Mərkəzinin istifadəyə verilməsidir. Vətəndaşlar 1111 nömrəsinə zəng edərək onları narahat edən məsələlər barədə məlumat verə biləcəklər. Bu müraciətlər operatorlar tərəfindən dərhal qəbul olunaraq vətəndaşlara müvafiq izahat veriləcəkdir. Mərkəzdə tətbiq olunan daha bir yenilik isə ölkənin müxtəlif bölgələri ilə birbaşa videokonfranslar keçirilməsi imkanının yaradılmasıdır. Burada ölkənin bütün şəhər və rayon icra hakimiyyətlərinin vətəndaş qəbulu otaqları və Prezident Administrasiyasının müvafiq struktur bölməsi ilə paralel olaraq əlaqə saxlamaq imkanı verən xüsusi rabitə sistemi vardır.
“Bu Mərkəzin istifadəyə verilməsi ictimai nəzarətin mühüm mexanizmlərindən biri olan vətəndaş müraciətlərinə daha operativ baxılmasına şərait yaradacaq. Mərkəzdə həm ilk dəfə qəbula gələn, həm də əvvəlcədən qəbula yazılan vətəndaşlar üçün iki qeydiyyat köşkü quraşdırılıb. Vətəndaşlar şəxsiyyət vəsiqəsi ilə qeydiyyatdan keçib müvafiq ardıcıllığa riayət etməklə qəbula yazıla və müraciət edə biləcəklər. Burada fəaliyyət göstərəcək könüllülər də bu prosesdə vətəndaşlara yardımçı olacaqlar.
“Bir sözlə, vətəndaş məmnunluğunun təmin edilməsi, dövlət qulluqçusu-vətəndaş münasibətlərinin keyfiyyətcə daha yüksək pilləyə qaldırılması, vətəndaşların qəbulunda şəffaflığın artırılması məqsədilə yaradılan Mərkəzdə bu işin təşkili üçün hər cür şərait vardır”, – deyə Administrasiya rəhbəri bildirib.
Bundan başqa, S.Nuriyev onu da qeyd edib ki, vətəndaşlar qəbulla yanaşı, Prezident Sarayına ənənəvi qaydada, yaxud rəsmi səhifə vasitəsilə elektron məktubla da müraciət edə bilərlər.
“Prezident Administrasiyasına daxil olan vətəndaş müraciətlərinin hər biri hərtərəfli təhlil olunur və qaldırılan bütün məsələlərə operativ qaydada baxılır” – deyə S.Nuriyev vurğulayıb.
