Azərbaycanda gənclərin Vətənə bağlı, bilikli şəxsiyyət kimi yetişməsi üçün davamlı addımlar atılır
Bayraqdar.info – “Bu gün öz uğurlarına görə regionun lider dövləti olan Azərbaycan eyni zamanda mütərəqqi gənclər siyasəti ilə dünyada fərqlənir. Təsadüfi deyil ki, Azərbaycanın gənclər siyasəti dünya miqyasında bir nümunəyə çevrilib. Ölkəmizdə gənc nəslin problemlərinin həlli, onların cəmiyyət həyatında layiqli təbəqə kimi iştirakının təmin olunması üçün davamlı tədbirlər həyata keçirilir”.
Bunu bayraqdar.info-ya açıqlamasında Milli Məclisin Gənclər və idman komitəsinin üzvü Vüqar İskəndərov deyib.
Onun sözlərinə görə, Azərbaycan az-az ölkələrdəndir ki, təqvimdə gənclərlə bağlı xüsusi gün var və həmin gün ölkədə xüsusi qeyd edilir. Öz növbəsində göstərilən diqqət və qayğıdan güc alan Azərbaycan gəncliyi həm də vətənpərvərliyi, öz xalqına və dövlətinə bağlılığı ilə fərqlənir.
Ali təhsil almaq istəyən gənclərə dövlət qayğısının növbəti təzahürü
V.İskəndərov bildirib ki, dövlət, şəxsən Prezident İlham Əliyev gənclərin savadlı yetişməsi, ölkənin və dünyanın nüfuzlu ali təhsil müəssisələrində təhsil alması üçün də lazımi dəstəyi göstərir: “Bir sözlə, Azərbaycan gənclərinin Vətənə bağlı, bilikli şəxsiyyət kimi yetişməsi üçün davamlı addımlar atılır. Elə Səfərbərlik və Hərbi Xidmətə Çağırış üzrə Dövlət Xidmətininin (SHXÇDX) bu günlərdə qəbul etdiyi qərar da bu istiqamətdə atılmış növbəti addımdır. Bu qərar ali təhsil almaq istəyən gənclərə dövlət qayğısının növbəti təzahürüdür”.
Məlumat üçün bildirək ki, SHXÇDX qəbul edilmiş qərarla bağlı martın 14-də məlumat yayıb. Həmin məlumatda deyilir ki, 2022/2023-cü tədris ili üzrə Azərbaycan ali təhsil müəssisələrinə sənəd qəbulunda çağırışçılarla bağlı müəyyən dəyişikliklər edilib. Bu dəyişiklik SHXÇDX-yə daxil olan çoxsaylı vətəndaş müraciətləri nəzərə alınaraq, təhsil sahəsində dövlət siyasətinin əsas prinsiplərini rəhbər tutmaqla vətəndaşların təhsil almaq imkanlarının genişləndirilməsi məqsədilə edilib. Belə ki, 18 yaşı 01 may 2022-ci il tarixdən sonra tamam olacaq əvvəlki ilin məzunlarına cari ildə ali təhsil müəssisələrinin bakalavriat səviyyəsinə qəbul üzrə müsabiqədə iştirak etmələri üçün imkan yaradılıb. Ali məktəblərə sənəd qəbulu zamanı qeyd olunan kateqoriyadan olan vətəndaşların hərbi vəzifəsi ilə bağlı SHXÇDX-nin vahid elektron informasiya sisteminə heç bir sorğu edilmədən “Abituriyentin elektron ərizəsi” birbaşa təsdiq edilir.
Azərbaycan dövlətinin təhsilə verdiyi önəmin daha bir bariz nümunəsi
Öz növbəsində “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli bu qərarı yüksək dəyərləndirib. Bayraqdar.info-ya açıqlamasında hərbi ekspert deyib ki, SHXÇDX-nin vətəndaşların çoxsaylı istəklərini nəzərə alaraq abituriyentlərə növbəti şans verməsi çox humanist bir addımdır: “Bu qərar Prezident İlham Əliyevin Azərbaycan vətəndaşlarına göstərdiyi diqqət və qayğının növbəti göstəricisidir. Cənab Prezident istəyir ki, Azərbaycanın gəncləri savadlı, bilikli, təhsilli olsunlar. Bu, Azərbaycan dövlətinin təhsilə verdiyi önəmin daha bir bariz nümunəsidir. Bir ildən artıqdır ki, valideyn və abituriyentlər bunu gözləyirdi. Beləliklə, SHXÇDX gənclərimizin təhsil alması üçün bu təqdirəlayiq addımı atdı”.
Müsahibimiz onu da deyib ki, qərara əsasən, SHXÇDX-dən arayış almadan birbaşa imtahamda iştirak etmək mümkün olacaq: “Bu da cənab Prezident İlham Əliyevin önəmli tapşırıqlarından biridir. Tapşırıq ondan ibarətdir ki, dövlət qurumları öz aralarında bu kimi məsələləri həll etsinlər. Bu, həmçinin şəffaflığın təmin olunması üçün gözəl addımdır. SHXÇDX cənab Prezidentin tapşırığına müvafiqv olaraq çağırış sistemində bu şəffaflığı yaradıb”, – deyə hərbi ekspert sonda əlavə edib.
