Son yeniləmə: 16 Mart 2022 09:24
Bayraqdar.info – “Qusar rayonunda əkin və bağ sahələrinin suvarma suyu ilə təminatı yaxşılaşdırılır”.
Bunu bayraqdar.info-ya martın 16-da Azərbaycan Meliorasiya və Su Təsərrüfatı Açıq Səhmdar Cəmiyyətinin mətbuat katibi Dilqəm Şərifov bildirib.
Onun sözlərinə görə, Azərbaycanın bütün bölgələrində olduğu kimi, Qusar rayonunda da əkin və bağ sahələrinin suvarma suyu ilə təminatının yaxşılaşdırılması istiqamətində ardıcıl tədbirlər həyata keçirilir: “Hazırda rayon Suvarma Sistemləri İdarəsi tərəfindən yeni mövsümə hazırlıq işləri görülür. Bu məqsədlə torpaq məcralı kanallar lil və kol-kosdan təmizlənir, beton kanalların ətrafında təmizlik işləri aparılır. Həmçinin torpaq məcralı kanallar beton üzlüklə əvəz edilir. Bu da öz növbəsində su istehlakçılarını vaxtında və itkisiz suvarma suyu ilə təmin etməyə imkan verir”.
D.Şərifov “ vaxtında görülən meliorativ tədbirlərin nəticəsidir ki, ötən suvarma mövsümündə təsərrüfat sahibləri sahalərini suvarmaqda heç bir çətinlik yaşamayıblar. Fermerlərin su ilə təminatında subartezyan quyularının da xüsusi rolu var. Onu da bildirək ki, son illər rayon ərazisində 41 subartezyan quyusu qazılıb. Onlar 9-u ötən il istifadəyə verilib. Cari ildə isə daha 3 subartezyan quyusunun istifadəyə verilməsi nəzərdə tutulub”, – deyə əlavə edib.
O da qeyd edilib ki, Qusarrayonunda 29 min 300 hektar suvarılan ərazi mövcuddur: “Bu sahələr 1579 km uzunluğunda olan kanallar vasitəsi ilə suvarılır. Bu kanalların 1381 km-i torpaq, 187 km-i isə beton məcralıdır. Hazırda bağ və əkin sahələrinin su təminatının yaxşılaşdırılası məqsədi ilə rayonun Kuzunqışlaq kəndində elektrik nasos stansiyası inşa edilir. Nasos stansiyası istifadəyə verildikdən sonra qeyd olunan ərazidə suvarma təminatı nəzərəçarpacaq dərəcədə yaxşılaşacaq”.
