Son yeniləmə: 15 Mart 2022 22:27
Bayraqdar.info – ABŞ Dövlət katibi Entoni Blinken martın 15-də Prezident İlham Əliyevə zəng edərək bir sıra məsələləri müzakirə edib.
Bu haqda xəbəri bayraqdar.info-ya ABŞ Dövlət Departamentindən veriblər.
Departamentin sözçüsü Ned Praysın adından yayılan xəbərdə deyilir ki, Dövlət katibi ABŞ-Azərbaycan münasibətlərinin əhəmiyyətini qeyd edib. Eyni zamanda o, ölkəsinin Güney Qafqazın dinc, demokratik və zəngin inkişafına sadiq olduğunu deyib.
Ermənistan və Azərbaycan arasında son vaxtlar müşahidə edilən gərginliyə də toxunan E.Blinken tərəfləri təmkinli olmağa və ortaya çıxan bütün məsələləri hərtərəfli həll etmək üçün diplomatik çalışmaları sürətləndirməyə çağırıb.
Dövlət katibi Azərbaycanda insan haqları və təməl hüquqlara hörmətin əhəmiyyətini də vurğulayıb.
E.Blinken ABŞ-ın digər tərəfdaşlarıyla birlikdə Aleksandr Lukaşenkonun başçılıq etdiyi Belarus rejimi də daxil olmaqla Moskva və onun dəstəkçilərini Ukraynaya qarşı əsassız və ədalətsiz müharibəyə görə məsul tutduğunu vurğulayıb.
I spoke with @presidentaz on the importance of resolving regional conflicts and pursuing a path to peace in the South Caucasus. I thanked Azerbaijan for the support provided to Ukraine.
— Secretary Antony Blinken (@SecBlinken) March 15, 2022
Əlavə edək ki, Azərbaycan Prezidentinin mətbuat xidmətinin yaydığı xəbərdə E.Blinkenin Ukraynaya edilən humanitar yardımlara görə Azərbaycana təşəkkür etdiyi də bildirilir.
