Bayraqdar.info – Martın 11-də Bakıda Azərbaycan Respublikası ilə İran İslam Respublikası arasında iqtisadi, ticarət və humanitar sahələr üzrə Dövlət Komissiyasının 15-ci iclası keçirilib. İclas çərçivəsində Kiçik və Orta Biznesin İnkişafı Agentliyi (KOBİA) və İranın Kiçik Sənaye və Sənaye Parkları Təşkilatı (ISIPO) arasında əməkdaşlığa dair Anlaşma Memorandumu imzalanıb.
Bu barədə bayraqdar.info-ya martın 12-də KOBİA-dan məlumat verilib.
Bildirilib ki, sənədi KOBİA-nın İdarə Heyətinin sədri Orxan Məmmədov və İranın yollar və şəhərsalma nazirinin müavini Xeyrulla Xadəmi imzalayıblar.
Memoranduma əsasən tərəflər sahibkarlıq üzrə təlim, seminar, mübadilə proqramlarının təşkili sahəsində əməkdaşlıq edəcək. Həmçinin KOB-ların rəqabət qabiliyyətini dəstəkləmək və qarşılıqlı olaraq bazarlara çıxışının genişləndirilməsi üçün sənaye parklarında iştirak təşviq olunacaq, innovativ sahibkarlıq və informasiya texnologiyaları transferinin asanlaşdırılması üçün tədbirlər görüləcək.
Bundan başqa İran və Azərbaycanın kiçik müəssisələrinin iştirakı ilə biznes assosiasiyaların yaradılmasına dəstək üçün qarşılıqlı biznes missiyalar, görüşlər və səfərlər təşkil olunacaq, KOB-ların məhsul və xidmətlərinə, birgə müəssisələrin yaradılması imkanlarına, tədbirlər və sərgilərə dair qarşılıqlı məlumat mübadiləsi aparılacaq.
