Son yeniləmə: 23 Fevral 2022 17:38
Bayraqdar.info – Fevralın 23-də “Yaradıcı sənayelərdə çağırışlar və biznes imkanları” mövzusunda ictimai müzakirə təşkil olunub.
Bu barədə bayraqdar.info-ya Kiçik və Orta Biznesin İnkişafı Agentliyindən (KOBİA) məlumat verilib.
Bildirilib ki, ictimai müzakirənin təşkilində məqsəd Azərbaycanda yaradıcı sənayenin inkişaf etdirilməsi, bu sahədə biznesin dəstəklənməsi, yaradıcı şəxslərin və biznes subyektlərinin təşkilatlanması, müvafiq sektorda dövlət və özəl sektor arasında əlaqələrin genişləndirilməsini müzakirə etməkdir.
Mədəniyyət Nazirliyinin, Əqli Mülkiyyət Agentliyinin, Kiçik və Orta Biznesin İnkişafı Agentliyinin (KOBİA) dəstəyi, KOBİA yanında İctimai Şuranın və Azərbaycan Yaradıcı Sənayelər Federasiyasının təşkilatçılığı ilə keçirilmiş tədbirdə aidiyyəti dövlət qurumlarının nümayəndələri və yaradıcı sənaye sahəsində fəaliyyət göstərən sahibkarlar iştirak ediblər.
Tədbirdə qeyd edilib ki, iqtisadiyyat, mədəniyyət, qabaqcıl texnologiya və innovasiyaları özündə birləşdirən yaradıcı və mədəniyyət sənayeləri dünyada dinamik inkişaf edir. Ədəbiyyat, dizayn, musiqi və teatr, memarlıq, moda və təsviri sənət, film, video və foto sənəti, reklam və s. kimi sahələrdən ibarət olan yaradıcı sənaye həm də biznes sahəsidir. Azərbaycanda da bu sahənin inkişafı və biznes imkanları genişdir.
KOBİA yanında İctimai Şuranın sədri Fərhad Qaraşov tədbirin yaradıcı sənaye sahəsində biznes potensialının müzakirə olunması, bu sahədə fəaliyyət göstərən sahibkarlıq subyektlərinin qarşılaşdıqları çətinliklərin dinlənilməsi və dövlət-özəl əməkdaşlığının gücləndirilməsi məqsədilə təşkil olunduğunu diqqətə çatdırıb.
Mədəniyyət naziri Anar Kərimov iqtisadiyyatın bir sahəsi olan yaradıcı sənayenin qlobal miqyasda sürətlə inkişaf edərək prioritet sektorlardan birinə çevrildiyini və bu sahəyə böyük marağın olduğunu bildirib. Qeyd olunub ki, yaradıcı sənayenin inkişafı istiqamətində nazirliyin fəaliyyəti çoxşaxəlidir.
Bu sahədə qanunvericiliyin təkmilləşdirilməsi, Azərbaycan Yaradıcı Sənayelər Federasiyası ilə birgə bu sahədə yaxşı təcrübənin və sektorun problemlərinin öyrənilməsi, satış platformalarının yaradılması və digər istiqamətlərdə işlər aparılır.
Tədbirə onlayn formatda qoşulan Əqli Mülkiyyət Agentliyinin İdarə Heyətinin sədri Kamran İmanov təqdimatında Agentliyin müvafiq sahədə fəaliyyəti barədə məlumat verib. O, əqli mülkiyyət və kreativlik anlayışlarının sıx təmasda olduğunu, kreativ sənayenin və müəlliflik hüququna əsaslanan sahələrin ÜDM-də payının artdığını diqqətə çatdırıb.
KOBİA-nın İdarə Heyətinin sədri Orxan Məmmədov yaradıcı sənayenin dünyada sürətlə inkişaf edən sektorlardan biri kimi qlobal səviyyədə hər il orta hesabla 2 trilyon ABŞ dollarından artıq gəlir yaratdığını, 30 milyon iş yerini təmin etdiyini qeyd edib. Azərbaycanda da yaradıcı sənayenin inkişafı üçün geniş potensialın olduğunu vurğulayan KOBİA sədri kreativ sahibkarların reyestrinin formalaşdırılmasına, yaradıcı turizm istiqamətinin genişləndirilməsinə, kreativ klasterlərin yaradılmasına, yaradıcı şəxslərin sahibkarlıq fəaliyyətinə başlaması üçün onlara lazımi dəstəyin göstərilməsinə, sektorun ixrac potensialının artırılmasına dair təkliflər səsləndirib.
Azərbaycan Yaradıcı Sənayelər Federasiyasının İdarə Heyətinin sədri Vasif Eyvazzadə qeyd edib ki, yaradıcı sənaye sahəsinin üç prinsipial istiqamətdə inkişaf etdirilməsi zəruridir. Bunlar hüquqi, institusional və maliyyə mexanzimlərinin təkmilləşdirilməsi istiqamətləridir.
Tədbirdə mövzu ilə bağlı müxtəlif fikir və təkliflər səsləndirilib.
Tədbir çərçivəsində müvafiq qurumların nümayəndələri sahibkarlıq subyektlərini maraqlandıran sualları cavablandırıblar.
