Son yeniləmə: 18 Fevral 2022 09:29
Bayraqdar.info – Biləsuvarda suvarma kanalı beton üzlüyə alınıb.
Bunu bayraqdar.info-ya fevralın 18-də Azərbaycan Meliorasiya və Su Təsərrüfatı Açıq Səhmdar Cəmiyyətinin mətbuat katibi Dilqəm Şərifov bildirib.
Onun sözlərinə görə, Biləsuvar Suvarma Sistemləri İdarəsi tərəfindən yeni suvarma mövsümünə hazırlıq işləri davam edir. Bu məqsədlə idarənin balansında olan torpaq məcralı kanallar su itkisnin qarşısının alınması məqsədilə beton üzlüyə alınır.
Qeyd edilib ki, 2021-ci ildə bu kanallardan uzunluğu 6 km olan R-1 kanalının beton üzlüyə alınmasına başlanılıb. Mənbəyini Cənubi-Muğan kanalından götürən kanal suvarma suyunun verilməsini asanlaşdırır və su istifadəçilərinə suyu vaxtında və itkisiz çatdırmağa kömək edir. Kanalın xidməti sahəsində 1600 hektara yaxın suvarılan torpaq sahəsi var. Həmin sahələrdə pambıq, taxıl və yem bitkiləri əkilir.
Biləsuvar Suvarma Sistemləri İdarəsinin balansında 69 ədəd nasos stansiya var. Bu stansiyalardan 22 ədədi elektrik enerjisi ilə, 47 ədədi isə dizel mühərrikləri vasitəsi ilə çalışır.
Ötən il həmin nasos stansiyalarda cari və əsaslı təmir işləri aparılıb. Bu il də plana uyğun olaraq bu işlər həyata keçiriləcək.
Keçən il ərzində bu nasoslar vasitəsi ilə Biləsuvar rayonu ərazisində 20600 hektar əkin sahəsi suvarılıb. Qalan ərazilərin suvarılması isə öz axını ilə aparılıb. Suvarma mövsümündə suyun su istifadəçilərinə daha sürətli və daha itkisiz çatdırılması üçün kanallar hər il lildən və kol-kosdan təmizlənir.
Qeyd edək ki, Biləsuvar Suvarma Sistemləri İdarəsinin balansında 50200 hektardan artıq suvarılan torpaq sahəsi mövcuddur. Bu sahələrin suvarılması öz axımı və nasos stansiyalar vasitəsilə həyata keçirilir.
