Son yeniləmə: 16 Fevral 2022 13:36
Bayraqdar.info – Qeyri-formal məşğulluqla mübarizə tədbiləri davam edir. Bu arada Prezident İlham Əliyevin 17 mart 2017-ci il tarixli Sərəncamı ilə yaradılmış Əmək Münasibətlərinin Tənzimlənməsi və Koordinasiyası Komissiyasının növbəti iclası keçirilib.
Bu barədə bayraqdar.info-ya fevralın 16-da Əmək və Əhalinin Sosial Müdafiəsi Nazilriyindən məlumat verilib.
Bildirilib ki, iclasda dövlət başçısının Sərəncamı ilə təsdiq edilmiş “Azərbaycan Respublikasında qeyri-formal məşğulluğun qarşısının alınmasına dair Tədbirlər Planı” çərçivəsində 2021-ci il ərzində görülən işlər, əldə edilən nəticələr, qarşıda duran vəzifələr müzakirə edilib.
Baş nazirin müavini, Əmək Münasibətlərinin Tənzimlənməsi və Koordinasiyası Komissiyasının sədri Əli Əhmədov qeyri-formal məşğulluğun qarşısının alınması sahəsində 2021-ci il ərzində görülmüş işlər, əldə edilmiş nailiyyətlər barədə məlumat verib. Komissiyanın sədri hesabat dövründə “Azərbaycan Respublikasında qeyri-formal məşğulluğun qarşısının alınmasına dair Tədbirlər Planı” üzrə tapşırıqların icrası ilə bağlı fəaliyyətin davam etdirildiyini bildirib.
Bu sahədə qəbul edilmiş qanunvericiliyin icrasına nəzarət, formal məşğulluğun təşviqi, maarifləndirmə, elektron nəzarət sistemlərinin qurulması və digər istiqamətlərdə tədbirlərin həyata keçirildiyi vurğulanıb. Əli Əhmədov Prezident İlham Əliyevin 17 dekabr 2021-ci il tarixli Sərəncamına əsasən cari ilin yanvarın 1-dən minimum əməkhaqqının məbləğinin 300 manata çatdırılmasının əhalinin sosial rifahının qorunması, muzdla işləyən şəxslərin layiqli əmək şəraitinin təmin edilməsi, eləcə də işçilərin formal məşğulluğa təşviqinə xüsusi töhvə verdiyini bildirib.
Həmçinin minimum əməkhaqqının məbləğinin 300 manata çatdırılmasının işçi qüvvəsinin rəqabət qabiliyyətinin, əmək məhsuldarlığının artmasını stimullaşdırdığı diqqətə çatdırılıb.
İclasda əmək və əhalinin sosial müdafiəsi nazirinin müavini, Qanunvericilik və idarəetmə üzrə İşçi qrupun rəhbəri Anar Əliyev tikinti sahəsində vətəndaşların əmək hüquqlarının qorunması, sosial təminatlardan yararlanmasının təmin edilməsi, əmək münasibətlərinin rəsmiləşdirilməsinə nəzarətin gücləndirilməsi və monitorinqin təşkili ilə bağlı məlumat verib.
Rəqəmsal inkişaf və nəqliyyat nazirinin müavini Rəhman Hümmətov avtomobil nəqliyyatı sahəsində qeyri-formal məşğulluq halları barədə, bununla mübarizə sahəsində görülən işlər haqqında çıxış edib.
Müzakirələrdə əmək və əhalinin sosial müdafiəsi naziri Sahil Babayev, Dövlət Statistika Komitəsinin sədri Tahir Budaqov və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev çıxış edərək müzakirə olunan məsələlərə münasibət bildiriblər.
Əmək Münasibətlərinin Tənzimlənməsi və Koordinasiyası Komissiyasının 2021-ci il üzrə fəaliyyətinə dair dövlət başçısına təqdim ediləcək hesabatın layihəsi müzakirə edilərək qəbul olunub.
Komissiyanın sədri qarşıda duran vəzifələrin icrası, o cümlədənformal məşğulluğun təşviqi istiqamətində maarifləndirmə tədbirlərininın gücləndirilməsinə dair tapşırıqlar verib.
