Son yeniləmə: 16 Fevral 2022 14:50
Bayraqdar.info – Azərbaycanda “Peşəkar Karyera Məsləhətçisi” adlı təlim kursu başlanır. Bu təlim kursu Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən təşkil edilir.
Bu barədə bayraqdar.info-ya fevralın 16-da Agentlikdən məlumat verilib.
Bildirilib ki, Agentliyin Mərkəzi Karyera filialının təşkil etdiyi təlim kursu Azərbaycan Universitetlərinin Karyera mərkəzlərində çalışan əməkdaşlar üçün nəzərdə tutulub.
Kursun məqsədi karyera mərkəzlərinin əməkdaşlarının şəbəkələşməsinə dəstək göstərmək, peşəkar karyera məsləhətçilərinin bilik və bacarıqlarının artırılmasına töhfə vermək, mövcud çətinlikləri müzakirə edərək yerli təcrübələri və həll yollarını bölüşməkdən ibarətdir.
Təlimlər Agentliyin karyera planlaması üzrə ekspertləri tərəfindən keçiriləcək. Proqrama 14 onlayn təlim və 3 əyani şəbəkələşmə görüşü daxildir. Kursun müddəti isə 2 aydır.
Maraqlananlar bu link vasitəsilə müraciət edə bilərlər.
